कतारी उद्योगीलाई नेपालमा लगानी गर्न राष्ट्रपति भण्डारीको आग्रह

कात्तिक १३, २०७५ बुधबार ५:३७:२८ | रासस

काठमाडौं - राष्ट्रपति विद्यादेवी भण्डारीले नेपाल-कतार व्यावसायिक मञ्चलाई सम्बोधन गर्नुभएको छ। कतार भ्रमणको दोस्रो दिन व्यावसायिक मञ्चलाई सम्बोधन गर्दै राष्ट्रपति भण्डारीले नेपालमा ढुक्क भएर लगानी गर्न यहाँका उद्योगी व्यापारीलाई आग्रह गर्नु भएको हो ।

नेपाल र कतारबीच कूटनीतिक सम्बन्ध स्थापना भएको ४० वर्ष नाघिसकेको र दुई देशबीचको राजनीतिक तथा आर्थिक सम्बन्ध अझ सुदृढ हुँदै गएकाले नेपाल र कतारबीच श्रम सम्बन्धमात्र नभएर प्रविधि, लगानी, व्यापार तथा पर्यटन जस्ता आर्थिक कूटनीतिका विविध आयामहरूमा समेत राम्रो सम्बन्ध विस्तार भइरहेको राष्ट्रपति भण्डारीले उल्लेख गर्नु भएको छ।

राष्ट्रपति भण्डारीले कतार नेपाली श्रमिकहरूका लागि राम्रो श्रम गन्तव्यको रूपमा रहेको साथै, कतार नेपालबीच सीधा हवाई सम्पर्क र छोटो दूरीका कारण जनस्तरमा समेत राम्रो सम्पर्क रहेको जनाउनु भएको छ।

यसबाट नेपाल-कतारबीच आवागमन सहज हुनुका साथै अन्य मुलुकबाट आउने पर्यटकहरूको आवागमनमा पनि सहजता आउने विश्वास व्यक्त गर्नु भएको छ ।
राष्ट्रपति भण्डारीले भन्नुभयो, “नेपालमा राजनीतिक स्थिरता कायम भई देश समृद्धिको मार्गमा लागिसकेको कुरा व्यक्त गर्न पाउदा मलाई गौरवानुभूति भएको छ । तीव्र गतिमा विकासलाई अगाडि बढाउनका लागि हामीलाई प्रविधि र वित्तीय स्रोतको आवश्यकता छ ।
तपाईं कतारका व्यवसायी र लगानीकर्ताहरूलाई म आह्वान गर्न चाहन्छु ( तपाईँहरू अब नेपालमा लगानी गर्न आउनुहोस् । यहाँहरुले प्रत्यक्ष वैदेशिक लगानी वा नेपाली लगानीकर्तासँग मिलेर संयुक्त लगानी पनि गर्नसक्नुहुन्छ” ।

उहाँले नेपालमा गरिने लगानीले उच्च प्रतिफल दिने र लगानीको प्रतिफल फिर्ताको ग्यारेण्टी समेत नेपाल सरकारले गर्ने प्रतिबद्धता व्यक्त गर्नुभएको छ। त्यसैले ढुक्क भएर पर्यटन, ऊर्जा, कृषि, पूर्वाधार र उत्पादनमूलक उद्योग आदिमा लगानी गरी भरपुर फाइदा उठाउन कतारी लगानीकर्तालाई आग्रह गर्नुभएको छ।

उहाँले भन्नुभयो, “राम्रो पूर्वाधार निर्माण गर्नसके नेपालको पर्यटन क्षेत्रले ठूलो फड्को मार्न सक्नेछ । त्यसैले नेपालमा पर्यटन पूर्वाधारको लगानी गर्दा उचित प्रतिफल दिने निश्चित छ, हिमालहरूबाट स्वच्छ पिउने पानी उत्पादन गरी निर्यात गर्ने प्रचुर सम्भावना पनि त्यत्तिकै रहेको छ, यसैगरी नेपालको भौगोलिक विविधताका कारण जैविक खेती, पशुपालन र मासु उत्पादनको ठूलो सम्भावना रहेको छ । यही सम्भावनालाई मध्यनजर गरेर कृषि, पशुपालन र मासु विकासको क्षेत्रमा साझेदारीलाई अगाडि बढाउन आजै मात्र दुई देशबीच समझदारीपत्रमा हस्ताक्षर भएको छ ।भौगोलिक दूरीका हिसाबले पनि कतार नजिक रहेकोले यहाँका व्यवसायीहरूले नेपालमा विविध क्षेत्रमा लगानी गरी त्यस्को उत्पादन कतार ल्याएर उपभोग गर्न वा विश्व वजारमा बेच्न सक्ने सहज अवस्था छ” ।

राष्ट्रपति भण्डारीले कतारमा ठूलो संख्यामा नेपाली रहेका र उनीहरू राम्रोसित घुलमिल समेत भएकाले यस सम्बन्धलाई उपयोग गरी दुवै मुलुकको हितका लागि काम गर्ने अवसर आएको बताउनु भएको छ। उहाँले भन्नु भयो “ ( अनुकूल श्रम सम्बन्ध, सस्तो र युवा जनशक्तिको सहज उपलब्धता, झण्डै ३ करोड जनसंख्याको आन्तरिक बजार तथा छिमेकमा रहेका विशाल बजार तथा लगानीको सुरक्षाका लागि विभिन्न कानूनी र संस्थागत प्रबन्धहरुले नेपालमा लगानीलाई आकर्षक र सुरक्षित बनाएका छन् । यस्तो लगानीले दुवै देशको समृद्धिमा सहयोग पुर्या उने र यसले दुईपक्षीय सम्बन्धलाई थप बलियो बनाउने छ ।

यसै कार्यक्रमलाई सम्बोधन गर्दै नेपाल लगानी बोर्डका कार्यकारी अधिकृत महाप्रसाद अधिकारी, नेपाल उद्योग वाणिज्य संघकी अध्यक्ष भवानी राणा, नेपाल उद्योग परिसंघका पूर्व अध्यक्ष हरि शर्मा लगायतलले पनि नेपालमा कतारका उद्योगी(व्यवसायीलाई लगानी गर्न आग्रह गर्नु भएको छ ।

अन्तिम अपडेट: मंसिर ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्