रूसमा विद्रोहको नेतृत्व गरेको दुई महिनापछि हवाई दुर्घटनामा ज्यान गुमाएका वाग्नर समूहका प्रमुख येभ्गेनी प्रिगोजिनबारे फैलिएको अफवाहलाई रुसले खण्डन गरेको छ ।

मस्को र सेन्ट पिटर्सबर्गको बीचमा प्रिगोजिन चढेको निजी विमान दुर्घटना भएपछि क्रेमलिनको संलग्नता हुनसक्ने अनुमान गरिएको छ । तर रुसले यी आरोप पूर्णरुपमा झुटा भएको दाबी गरेको छ ।

क्रेमलिनका प्रवक्ता दिमित्री पेस्कोभले हिजो आरोपको खण्डन गर्नुभयो । उहाँले थप अनुसन्धानबाट दुर्घटनाको बारेमा तथ्यहरू बाहिर ल्याउने समेत बताउनुभएको छ ।

रूसी राष्ट्रपति भ्लादिमिर पुटिनले हवाई दुर्घटनामा ज्यान गुमाएका १० जनाको परिवारप्रति समवेदना प्रकट गर्नुभएको चिनियाँ समाचार संस्था सिन्ह्वाले जनाएको छ । गएको जुन महिनामा रूसको सैन्य नेतृत्वविरुद्ध भएको विद्रोहको नेतृत्व गरेका प्रिगोजिनको बुधवार मस्को नजिक भएको हवाई दुर्घटनामा ज्यान गएको हो ।