रुससँगको युद्धका कारण युक्रेनमा एक खर्ब ५१ अर्ब अमेरिकी डलरभन्दा धेरै रकम बराबरकाे भौतिक पूर्वाधार ध्वस्त भएको अध्ययन प्रतिवेदन सार्वजनिक भएको छ ।

यो वर्षको सेप्टेम्बर महिनासम्म युक्रेनमा एक खर्ब ५१ अर्ब दुई करोड अमेरिकी डलर बराबरको प्रत्यक्ष क्षति पुगेको इन्टरफ्याक्स न्युज एजेन्सीले जनाएको छ । किभ स्कुल अफ इकोनोमिक्सको अध्ययनअनुसार युद्धबाट सबैभन्दा धेरै आवास क्षेत्र प्रभावित भएको छ । लगभग एक लाख ६७ हजार दुई सय वटा निजी घर, अपार्टमेन्ट भवन र छात्रावास नष्ट वा क्षतिग्रस्त भएका छन् ।

द्वन्द्व शुरु भएदेखि १८ वटा विमानस्थल र सिभिल एअरफिल्ड पनि ध्वस्त भएका छन् । यस्तै युक्रेनमा तीन सय ४४ वटा पुल र ओभरपास क्षतिग्रस्त भएका छन् । कम्तीमा चार सय २६ वटा ठूला र मध्यम आकारका उद्योग पनि ध्वस्त भएका खबरमा उल्लेख छ ।