दुई महिनापछि कर्मचारी पुगेपछि जुम्लाको सिंजामा नागरिकता वितरण शुरु

 कात्तिक १७, २०८० शुक्रबार ९:४५:४२ | नेत्र शाही
unn.prixa.net

जुम्ला - जुम्लाको सिंजामा रहेको इलाका प्रशासनमा अधिकृतस्तरको कर्मचारी नहुँदा रोकिएको नागरिकता वितरण कार्य शुरु भएको छ । 

गृह मन्त्रालयले मन्त्रालयमा कार्यरत अधिकृत रेश्मा बुढाक्षेत्रीलाई खटाएपछि इलाका प्रशासन कार्यालयबाटै नागरिकता वितरणकाे कार्य शुरु भएकाे हाे । 

इलाका प्रशासन कार्यालयमा अधिकार प्राप्त कर्मचारी पुग्नेबित्तिकै एकैदिनमा ६९ जनाले नागरिकता प्राप्त गरेका छन् । प्रशासन प्रमुख रेश्मा बुढाकाअनुसार आफू १५ गते काठमाण्डाै, नेपालगञ्ज, जुम्लाबजार हुँदै सिधैँ इलाका प्रशासन कार्यालय सिंजामा ५ बजे हाजिर भएको जानकारी दिनुभयो । उहाँले १६ गते एकैदिन ६९ जनाले नागरिकता प्राप्त गरेकाे जानकारी दिनुभयो । 

अहिले कार्यालयमा नागरिकता लिन सेवाग्राहीको भिड बढेको छ । भिड व्यवस्थापन गर्न इलाका प्रशासनले आज प्रहरीको साथमा लाइन व्यवस्थित समेत गर्ने बताइएको छ । यसबेला अध्ययन गर्ने विद्यार्थी दशैँ तिहारमा घर आउने हुनाले बढी नागरिकता लिने गर्दछन् । तर कर्मचारी नै नहुँदा सास्ती भइरहेको समयमा अधिकृत बुढाले समस्या सामाधान गर्न आफू खटिएको बताउनुभयो । 

सिंजा क्षेत्रको ३ वटा गाउँपालिका हिमा, सिंजा र कनकासुन्दरी (साविक ११ गाविस) लाई मध्यनजर गर्दै सरकारले सिंजाको नराकोटमा इलाका प्रशासन कार्यालय स्थापना गरेको थियो । अधिकृतस्तरको दरबन्दी भएको याे प्रशासनमा कर्मचारी आउन नमानेपछि २०७२ सालपछि नायब सुब्बालाई कायममुकायम बनाएर नागरिकता वितरण गरिँदै आएको थियो । २ महिनाअघि नासुको कार्य अधिकार सकिएपछि नागरिकता वितरण कार्य स्थगित भइ नागरिक हस्ताक्षर गर्न सदरमुकाम ल्याइ काम चलाउ गरिँदा सेवाग्राहीलाई असहज भएकाे थियाे । 

अन्तिम अपडेट: चैत ३०, २०८०

नेत्र शाही

जुम्लामा बसेर पत्रकारिता गर्ने नेत्र शाही उज्यालोका जिल्ला सहकर्मी हुनुहुन्छ । 

तपाईको प्रतिक्रिया