पुष्पलाल र बीपीको जन्मस्थानलाई पर्यटनस्थलको रूपमा विकास गर्छु : प्रधानमन्त्री प्रचण्ड

पुष १९, २०८० बिहीबार १९:३१:२६ | दीपक भट्ट

रामेछाप – प्रधानमन्त्री पुष्पकमल दाहाल प्रचण्डले पुष्पलाल श्रेष्ठको जन्मस्थान रामेछापको भंगेरी र बीपी काेइरालाको जन्मस्थान सिन्धुलीको दुम्जालाई राजनीतिक पर्यटनस्थलको रूपमा विकास गर्ने बताउनुभएकाे छ ।

आज बिहीवार रामेछापको सुनापति गाउँपालिकाको प्रशासकीय भवन उद्घाटन गर्दै प्रधानमन्त्री प्रचण्डले यस्ताे बताउनुभएकाे हाे । उहाँले मध्यपहाडी लोकमार्गको बाँकी काम सम्पन्न गर्न आवश्यक बजेट सङ्घीय सरकारले व्यवस्थापन गर्ने र रामेछापको विकासका लागि पनि सरकारले सक्दो प्रयास गर्ने बताउनुभयाे । संविधान कार्यान्वयनका लागि सरकारले ऐन कानुन बनाएर प्रदेश र पालिकालाई अझ बलियो बनाउने गरी काम भइरहेको उहाँकाे भनाइ छ ।

प्रचण्डले अहिलेको गठबन्धनको सरकार कुनै पनि हालतमा नटुट्ने भन्दै आफ्नो एक वर्षे कार्यकालमा आर्थिक, सामाजिक क्षेत्रमा उल्लेख काम भएकाे दाबी गर्नुभयाे । भारतलाई १० वर्षका लागि १० हजार मेगावाट बिजुली निर्यात गर्ने सहमतिले आज सार्थकता पाएकाे भन्दै बङ्गलादेशमा पनि बिजुली बिक्रीका लागि पहल गर्ने बताउनुभयाे ।

सुनापति गाउँपालिकाको सुविधा सम्पन्न नवनिर्मित भवन झन्डै तीन करोड ४८ लाख ५० हजार रुपैयाँकाे लागतमा बनेकाे हाे । याे भवनमा १० वटा कार्यालय कक्ष र एउटा सभाहल रहेकाे छ ।

प्रधानमन्त्रीले आजै सुनापतिको बेथानमा रहेकाे पानीघाटमा आयोजित २७ औँ बेथान वीरता दिवस, शहीद स्तम्भ उद्घाटन तथा शहीद परिवारका सदस्लाई सम्मानसमेत गर्नुभएकाे थियाे । याे ठाउँमा २०५३ पुस १९ गते बेथान प्रहरी चौकी आक्रमणका क्रममा बेथानका तीर्थ गौतम, फत्तबहादुर स्माली मगर र दिलमाया बम्जनको ज्यान गएको थियो । याे ठाउँमा बनेकाे शहीद पार्ककाे सालिकमा प्रधानमन्त्रीले माल्यार्पण गर्नुभएकाे थियाे । माओवादीले पुस १९ गतेलाई वीरता दिवसको रूपमा मनाउँदै आएको छ ।

अन्तिम अपडेट: मंसिर १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

दीपक भट्ट

दीपक भट्ट उज्यालोका रामेछाप सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्