नेपालमा पनि क्यान्सर जित्ने र उपचारपछि आयु लम्बिनेहरू बढ्दै

माघ २१, २०८० आइतबार ९:१९:३ | उज्यालो सहकर्मी

काठमाण्डौ – नेपालमा पनि क्यान्सरलाई जित्ने तथा उपचारबाट आयु लम्बिने क्रम बढेको छ । केही दशक अघिसम्म पनि उपचारै नभएको रोग मानिने क्यान्सरको उपचारसेवा अहिले नेपालमै उपलब्ध छ । अत्याधुनिक प्रविधि र चिकित्सा सेवाका कारण क्यान्सर जित्ने बढेको र उपचारबाट धेरैको आयु लम्बिएको डाक्टरहरु बताउँछन् ।

क्यान्सरको उपचार र क्यान्सर जित्ने क्रम विश्वमै बढेको छ । विश्व स्वास्थ्य सङ्गठन (डब्लुएचओ)को तथ्याङ्क अनुसार बितेको पाँच वर्षमा विश्वका ४८ हजार आठ सय जना भन्दा धेरैले क्यान्सरलाई पूर्ण रुपमा जितेका छन् । उपचारका कारण क्यान्सरको प्रभावलाई सीमित पारेर धेरैको आयु लम्बिएको छ ।

तर, उपचार महँगो हुँदा धेरैले उपचार गराउन सकेका छैनन् । क्यान्सरको उपचार गराउँदा धेरै परिवारले भएको सम्पत्ति सकिएर पनि ऋणमा फसेका छन् । यस्तै रोगको पहिचान र निदानका लागि लामो समय लाग्दा बिरामी र आफन्तले हैरानी खेप्नु परेको छ ।

नेपालमा क्यान्सरको उपचारकै क्रममा घरवारविहीन भएका र खर्च जुटाउन हारगुहार गरिरहेका घटना धेरै देखिन्छ । क्यान्सरको उपचारका लागि नेपाल सरकारले पाँच लाख रुपैयाँसम्म सहयोग उपलब्ध गराउँछ । तर महँगो शुल्कको तुलनामा निकै कम हो ।

नसर्ने रोग भए पनि क्यान्सरको समस्या विश्वव्यापी रुपमै बढिरहेको डब्लुएचओले जनाएको छ । अघिल्लो वर्ष विश्वमा झण्डै दुई करोड जना क्यान्सरका नयाँ बिरामी भेटिएका छन् । ९७ लाख जना भन्दा धेरैको क्यान्सरका कारण ज्यान गएको छ ।

विश्वमा सबैभन्दा धेरै देखिएको स्तन क्यान्सर हो । दोस्रोमा फोक्सोको क्यान्सर रहेको छ । क्यान्सरको कारणमध्ये २२ प्रतिशत चुरोट, बिँडी रहेको विश्व स्वास्थ्य सङ्गठनको तथ्याङ्क छ । झण्डै १० प्रतिशतमा वंशाणुगत क्यान्सर हुन्छ ।

यसैबीच आज 'स्याहारमा भएको फरकलाई बन्द गरौँ ' भन्ने नारा सहित विश्व क्यान्सर दिवस नेपालमा पनि मनाइँदै छ । हरेक वर्ष फेब्रुअरी ४ तारिखका दिन क्यान्सर दिवस मनाइन्छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्