कञ्चनपुर – कञ्चनपुरमा वन डढेलो, अतिक्रमण, फडानी, चोरी शिकारलगायतका कारण जैविक विविधता संरक्षणमा चुनौती थपिएको वातावरण संरक्षणका अभियन्ताहरूले बताएका छन् ।

अन्तर्राष्ट्रिय जैविक विविधता दिवसको अवसरमा हिजो शुक्लाफाँटा नगरपालिका– १० झलारीमा भएको जलवायु परिवर्तनका प्रभाव न्यूनीकरणकरणसम्बन्धी एक दिने तालिममा डिभिजन वन कार्यालय कञ्चनपुरका प्रमुख भीमप्रसाद कँडेलले मानवीय आवश्यकता बढ्दै जाँदा वन क्षेत्र घट्दै जानु चिन्ताको विषय भएको बताउनुभयो । देशमा सबैभन्दा बढी कैलाली र कञ्चनपुरमा वन अतिक्रमण भएको चर्चा गर्दै उहाँले त्यसबाट वन्यजन्तुको बासस्थान तथा सिमसार क्षेत्रको संरक्षणमा चुनौती थपिएको बताउनुभयो ।

कार्यक्रममा निकुञ्ज, संरक्षित क्षेत्रलगायत प्राकृतिक स्थलमा बस्ने जीवजन्तुलाई मात्र संरक्षण गरेर नहुने भएकाले चरन क्षेत्रमा निर्भर स्थानीय समुदायको जीविकोपार्जनप्रति पनि ध्यान दिनुपर्नेमा जोड दिइएको छ ।