काठमाण्डौ – उदयपुर, बारा, मकवानपुर, सिन्धुपाल्चोकलगायतका जिल्लामा पानी परेको छ । ती क्षेत्र भएर बग्ने नदी तथा खोलामा जलसतह बढ्न सक्ने भएकाले तटीय क्षेत्रमा सावधानी अपनाउन बाढी पूर्वानुमान महाशाखाले आग्रह गरेको छ ।

महाशाखाका अनुसार आज झापा, इलाम, पाँचथर, डोटी, कैलाली, कञ्चनपुर, डडेलधुरा र आसपासका जिल्ला भई बहने साना नदीमा बहाव बढ्ने तथा केही ठाउँमा आकस्मिक बाढीको मध्यम जोखिम रहने पूर्वानुमान छ ।

त्यस्तै भोलि र पर्सि कोशी, बाग्मती, गण्डकी, लुम्बिनी, सुदूरपश्चिम भई बहने स–साना नदीमा बहाव उल्लेख्य बढ्ने र आकस्मिक बाढीको मध्यम जोखिम रहने अनुमान छ ।

त्यस्तै पर्सि कोशी, नारायणी, कर्णाली, महाकाली र यसका सहायक नदीहरू साथै कन्काई, कमला, बाग्मती, पूर्वी राप्ती, पश्चिम राप्ती र बबई नदीको जलसतह उल्लेख्य बढ्ने पूर्वानुमान भएकाले त्यस क्षेत्रका बासिन्दालाई पनि आवश्यक तयारी अपनाउन महाशाखाले अनुरोध गरेको छ ।