थोरै ठाउँबाहेक सबैतिर निरन्तर वर्षा, नदी र खोलामा बाढी

असोज ११, २०८१ शुक्रबार १५:०:२२ | उज्यालो सहकर्मी

काठमाण्डाै – देशका थोरै ठाउँबाहेक सबैतिर निरन्तर पानी परिरहेको छ । केही ठाउँमा निकै ठूलो पानी परिरहेको जल तथा मौसम पूर्वानुमान महाशाखाले जनाएको छ । कतिपय नदी र खोलामा बाढी आएको छ ।

कपिलवस्तुको कोइली नदी वाणगङ्गा जलमापन केन्द्रमा जलसतह सतर्कता तह आसपास रहेको र बढ्दो क्रममा रहेकाले नदी तटीय क्षेत्रको डुबान भइरहने होचा भागमा रहनेलाई उच्च सतर्कता अपनाउन भनिएको छ ।

त्यस्तै सुनसरीको चतरा, तरहरा, मोरङको केराबारी, विराटनगर एअरपोर्ट, हरैचा, बाउने र आसपास ठूलो पानी परेको छ । सेउती, सर्दु, सुनसरी खोला, बुढी, खेसलिया, चिसाङ, लोहन्द्रा खोलालगायत अन्य स–साना खोलामा आकस्मिक बाढी तथा होचो भागमा डुबानको जोखिम छ । ती क्षेत्रमा पनि सतर्कता अपनाउन बाढी पूर्वानुमान महाशाखाले अनुरोध गरेको छ ।

पाल्पाको कुमलगाउँ, गण्डाकोट, जल्पा, अर्चले, बल्ड्याङगढी, नवलपरासी (बर्दघाट सुस्ता पूर्व) को डण्डा, दुमकौली, सेमारी, नवलपरासी (बर्दघाट सुस्ता पश्चिम) को देउराली नवल, रुपन्देहीको तिलोत्तमा, भैरहवा, लुम्बिनीको वर्षामापन केन्द्र र आसपासको क्षेत्रमा मध्यमदेखि ठूलो वर्षा मापन भएको छ । ती क्षेत्र भएर बग्ने कालीगण्डकी नदी, तिनाउ नदी, निस्ती खोला, बिनइ नदी, मुकुन्डे खोला लगायत स–साना खोलामा आकस्मिक बाढीको जोखिम छ । तटीय क्षेत्र तथा डुबान भइरहने होचा ठाउँमा भोलिबिहान सम्म नै सतर्कता अपनाउन भनिएको छ ।

सप्तरीको रूपनी बजार, बर्माजिया, उदयपुरको सुन्दरपुर र आसपासको क्षेत्रमा पनि ठूलो पानी परेको छ । त्रियुगा, मौली, खाडोखोला लगायत अन्य स–साना खोलामा आकस्मिक बाढीको जोखिम छ । झापाको गौरादह, चण्द्रगढी, केचना, अनरमणी, इलामको कन्काई मैनाचुली वर्षामापन केन्द्र र आसपासका क्षेत्रमा मध्यमदेखि ठूलो पानी परेको छ । कन्काई, मेची, विरिङ, निन्दा र अन्य स–साना खोलामा आकस्मिक बाढीको तथा होचो भागमा डुबानको जोखिम छ । भोलि बेलुकासम्म नै लगातार पानी पर्ने सम्भावना रहेको मौसमविद गोविन्द झाले जानकारी दिनुभयो ।

उहाँका अनुसार पर्सि आइतवार बिहान पनि केही ठाउँमा पानी पर्ने सम्भावना छ । आइतवार दिउँसो या बेलुकीदेखि मौसममा क्रमिक सुधार हुने अनुमान छ । पर्सि आइतवारसम्म नै ठूलो पानी पर्ने भएकाले आज र भोलि पहाडी र हिमाली क्षेत्रमा रात्रिबस नचलाउन सरकारले आग्रह गरेको छ । यस्तै धान नकाट्न, अति आवश्यकबाहेक यात्रा नगर्न, तराई तथा मधेश क्षेत्रमा सकेसम्म भुइँ तलामा अन्नपात नराख्न, नदी किनारका बस्तीमा उच्च सतर्कता अपनाउन तथा दाउरा निकाल्ने र माछा मार्ने काम नगर्न पनि अनुरोध गरिएको छ ।

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

थोरै ठाउँबाहेक सबैतिर निरन्तर वर्षा, नदी र खोलामा बाढी

प्रतीकात्मक तस्बिर

तपाईको प्रतिक्रिया