काठमाण्डाै – सहकारीको बचत रकम अपचलनमा भारतको नयाँ दिल्लीबाट पक्राउ परेका बाग्लुङको ढोरपाटन नगरपालिकाका मेयर देवकुमार नेपालीलाई काठमाण्डौ ल्याइएको छ । पक्राउ परेका मेयर नेपालीलाई हिजो काठमाण्डौ ल्याइएको नेपाल प्रहरीको केन्द्रीय अनुसन्धान ब्युरो (सीआईबी) ले जनाएको छ ।

प्रहरीले सहकारी ठगीमा संलग्न अर्का व्यक्ति बाग्लुङकै ओमप्रसाद दर्जीलाई पनि काठमाण्डौ ल्याएको छ । पक्राउ परेका दुवै जनालाई थप अनुसन्धानका लागि आज जिल्ला प्रहरी कार्यालय बाग्लुङ पठाइएको सीआईबीका प्रवक्ता एवम् प्रहरी उपरीक्षक (एसपी) होबिन्द्र बोगटीले जानकारी दिनुभयो ।

सहकारी ठगीमा फरार रहेका ढोरपाटनका मेयर देवकुमार नेपाली गएको शुक्रवार दिल्लीबाट पक्राउ गरेका थिए । यसअघि गएको माघमा नेपाल प्रहरीको अनुरोधमा इन्टरपोलले मेयर नेपालीविरुद्ध रेड कर्नर नोटिस जारी गरेको थियो ।

मेयर नेपाली बाग्लुङ र पोखरामा सञ्चालनमा रहेको इमेज सहकारीका संस्थापक अध्यक्ष हुन् । उनीसहितका सहकारी सञ्चालकले बचतकर्चाको डेढ अर्ब रुपैयाँभन्दा धेरै रकम अपचलन गरेको मुद्दा बाग्लुङ जिल्ला अदालतमा विचाराधीन छ ।