काठमाण्डौ –  सुक्खा पहिरोका कारण अवरुद्ध पृथ्वी राजमार्गको मुग्लिन–काठमाण्डौ सडकखण्ड झण्डै पाँच घण्टापछि एकतर्फी खुलेको छ ।

पृथ्वी राजमार्गअन्तर्गत मलेखु नजिकै गजुरी गाउँपालिका–२ परेवा भिरमा खसेको पहिरोका कारण हिजो बेलुका सुक्खा पहिरो खस्दा सडक अवरुद्ध भएको थियो । सडक अवरुद्ध हुँदा काठमाण्डौ उपत्यकाबाट बाहिरिएका र भित्रिने गाडीमा यात्रा गर्ने हजारौँ यात्रु सडकमा रोकिएका थिए ।

इलाका प्रहरी कार्यालय गजुरीसहितको टोलीले डोजरको सहयोगमा राति पनि काम गरेर पाँच घण्टापछि सडक एकतर्फी खुलाएको प्रहरीले जनाएको छ  । तर सडक निकै जोखिमपूर्ण रहेकाले यात्रा गर्दा सावधानी अपनाउन र रातको समयमा विशेष सजग रहन यात्रु र गाडी चालकलाई ट्राफिक प्रहरीको आग्रह छ । सडक दुईतर्फी नै खुलाउने गरी मर्मतको काम भइरहेको प्रहरीको भनाइ छ ।