काठमाण्डाै – गृहमन्त्री रमेश लेखकले वर्षाजन्य विपद् प्रभावितहरूको पहिचान गरी सरकारलाई तत्काल नाम उपलब्ध गराउन पालिकाहरूलाई अनुरोध गर्नुभएको छ ।

मन्त्रालयमा आज भएकाे एक कार्यक्रमपछि पत्रकारहरूसँग कुरा गर्दै गृहमन्त्री लेखकले पालिकाले विपद् प्रभावितहरूको नाम पहिचान गरेर पठाएको तीन दिनभित्रै अस्थायी आवास बनाउनका लागि रकम उपलब्ध गराउने बताउनुभयो । पालिकाले जति चाँडो लाभग्राही पहिचान गरेर सङ्घ सरकारलाई नाम पठाउँछन्, त्यति नै चाँडो पीडितले राहत पाउने उहाँले बताउनुभयो ।

गृहमन्त्री लेखकले अविरल वर्षापछि देशभर बाढी र पहिरोका कारणले ठूलो जनधनको क्षति भएपछि सरकार गम्भीर भएर काममा लागेको दाबी गर्नुभयाे । उहाँले विपद्बाट ज्यान गुमाएका मृतकका परिवारलाई दुई लाख रुपैयाँ राहत दिने निर्णय गरेर सम्बन्धित जिल्लाहरूमा पैसा पठाइसकेको पनि बताउनुभयो ।