चितवन महोत्सवमा कृषि गोष्ठी :रासायनिक विषादीको प्रयोग बढ्दै गएकोमा चिन्ता

माघ ८, २०८१ मंगलबार ९:४५:३४ | उज्यालो सहकर्मी

काठमाण्डौ – चितवनमा चलिरहेको चितवन महोत्सवको अवसरमा भएको कृषि गोष्ठीमा रासायनिक विषादीको प्रयोग घटाउनुपर्नेमा विज्ञले जोड दिएका छन् ।

‘स्वच्छ उत्पादन, स्वस्थ खाना र युवा उद्यमशीलता विषादीरहित व्यावसायिक कृषि आजको आवश्यकता’ विषयक कृषि गोष्ठीमा कृषि विज्ञ कृष्ण पौडेल, सुजन अमागाईं, चन्द्रप्रसाद अधिकारीलगायतले कार्यपत्र प्रस्तुत गर्नुभयो ।

उहाँहरुले पछिल्लो समय कृषि उपजमा विषादीको प्रयोग बढ्दै गएकोमा चिन्ता व्यक्त गर्नुभयो । साथै विषादीको अनियन्त्रित प्रयोग भइरहेकोमा यसलाई घटाउँदै लैजानुपर्नेमा विज्ञको जोड छ । नेपालमा धेरै जसो तरकारीमा विषादीको प्रयोग उच्च रहेको विज्ञको भनाइ छ ।

विषादी छर्दा किसान आफैँ पनि असुरक्षित हुने भएकाले विज्ञहरुले किसानमा थप चेतनाको खाँचो रहेको बताउनुभएको छ । सुधारिएको प्राङ्गारिक कृषि प्रणाली अवलम्बन गरी रासायनिक विषादीको प्रतिस्थापन गर्नु आजको आवश्यकता भएको उहाँहरुको तर्क छ ।

विषादीको जथाभावी बिक्री वितरणलाई पनि नियन्त्रण गर्न जरुरी रहेको कृषि विज्ञले सुझाव दिनुभएको छ । किसानले विषादी प्रयोगको मात्रा बढाउँदै लगेको अवस्थामा यसले मानव स्वास्थ्यसँगै वातावरणमा पनि नकारात्मक प्रभाव पारिरहेको कृषि विज्ञ पौडेलले बताउनुभयो ।

कृषि तथा वन विज्ञान विश्वविद्यालय रामपुर चितवनकी उपकुलपति प्रा.डा.शारदा थपलियाले अहिले प्रयोग भइराखेको विषादी र औषधीले काम नगर्ने अवस्था आएको बताउनुभयो । किसानले कडा खालका विषादी खोज्ने गरेको र नपाएको खण्डमा भएकै विषादीलाई कडा बनाउने नाममा अत्यधिक प्रयोग गरिरहेको उहाँको भनाइ छ ।

एउटा विषादीको निरन्तर प्रयोग गरिरहँदा त्यसलाई किराले सहन गर्न सक्ने क्षमता विकास हुने अवस्थामा विषादीको मात्रा बढाउने नभई विषादीको परिवर्तन गर्नुपर्नेमा उहाँको जोड छ । कृषिमा अब रासायनिक मलभन्दा पनि प्राङ्गारिक मलको प्रयोगलाई बढाउँदै लैजानुपर्ने विज्ञको सुझाव छ ।

अन्तिम अपडेट: माघ ८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्