सरकारी कर्मचारी र जनप्रतिनिधिकै डेरामा जिप्रका : ठूलो परिमाणमा किर्ते नागरिकता र राहदानी भेटियो

मंसिर २८, २०७५ शुक्रबार १८:६:३९ | शैलेन्द्र महतो

धनुषा – डेरामा नै जिल्ला प्रशासन कार्यालय सञ्चालन गरेर नक्कली नागरिकता, राहदानीलगायत कागजात बनाइदिने गिरोहलाई ठूलो परिमाणमा कागजातसहित प्रहरीले पक्राउ गरेको छ ।

डेरामा नागरिकता–राहदानी बनाउन जिल्ला प्रशासनकै कर्मचारी संलग्न रहेको भेटिएको छ । प्रहरीले जिल्ला प्रशासन कार्यालय धनुषाका एक कर्मचारीलाई समेत पक्राउ गरेको छ ।

पक्राउ पर्नेहरुमा जनकपुर उपमहानगरपालिका ४ बस्ने तथा जिल्ला प्रशासन कार्याय धनुषाका कार्यालय सहयोगी ४२ वर्षका महावीर मण्डल, जनकपुर उपमहानगरपालिका देउरा रुपैठा बस्ने ३१ वर्षका रोशनकुमार चौधरी, रौतहटको दुर्गाभगवती गाउँपालिका ४ घर भई जनकपुर उपमहानगरपालिका ४ बस्ने हेमन्तकुमार पाण्डे र धनुषाको औरही गाउँपालिका ५ का वडा सदस्य समेत रहेका ४९ वर्षका गंगा साह रहेकाछन् ।

पक्राउ परेका उनीहरुलाई जिल्ला प्रहरी कार्यालय धनुषाले शुक्रबार पत्रकार सम्मेलन गरी सप्रमाण सार्वजनिक गरेको छ । बिहीबार दिउँसो ४ बजे जनकपुर उपमहानगरपालिका २० देउरा रुपैठाका रोशन चौधरीले डेरा लिएर बसेको कोठामा सुराकीको आधारमा खानतलासी गर्दा नक्कली नागरिकता, राहदानी, विवाह दर्ता, मृत्यु दर्ता, बसाइसराईको कागज, जिल्ला प्रशासन कार्यालयमा प्रयोग हुने सबै स्टाम्प, लेटरप्याड, विभिन्न व्यक्तिको तयार गरेको नागरिकता, फोटो, नागरिकता अनुसूचीको फारमलगायत बरामद भएको धनुषाका प्रहरी नायव उपरीक्षक दिपेन्द्र साहीले बताउनुभयो ।

सम्पूर्ण कागजातसहित नगद १ लाख ५३ हजार रुपैयाँ समेत उनीहरुको साथबाट बरामद गरेको प्रहरीले जनाएको छ । उनीहरुमाथि शुक्रबार जिल्ला अदालत धनुषामा सरकारी दस्तखत छाप किर्ते र नागरिकता मुद्दामा म्याद थप गरी अनुसन्धान भइरहेको छ ।

पत्रकार सम्मेलनमा धनुषाका प्रमुख जिल्ला अधिकारी प्रदीपराज कँडेलले नक्कली नागरिकता, राहदानी लगायतको कागजात तयार गराउने व्यक्तिहरु समेत कारबाहीको दायरामा आउने बताउनुभयो ।

अनुसन्धानको क्रममा यस कार्यमा संलग्न जिल्ला प्रशासन कार्यालयका कर्मचारी र अन्य व्यक्तिहरु समेत पाइए कडा कारबाहीको भागिदार हुने प्रमुख जिल्ला अधिकारी कँडेलको भनाई छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शैलेन्द्र महतो

शैलेन्द्र महतो उज्यालोका धनुषा सहकर्मी हनुहुन्थ्यो।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्