दिल्ली उच्च अदालतले भारतीय कांग्रेसका पूर्व सांसद सज्जन कुमारलाई सन् १९८४ को सिख दंगा मुद्दामा दोषी ठहर गर्दै जन्मकैदको सजाय सुनाइएको छ ।

अदालतले सज्जन कुमारलाई डिसेम्बर ३१ सम्म आत्मसमपर्ण गर्न समय दिएको छ । 

दिल्लीको एक तल्लो अदालतले सज्जन कुमारलाई २०१३ अप्रिलमा पाँच जना सिखको हत्याका सबै मुद्दा खारेज गरेको थियो । त्यसपछि केन्द्रीय जाँच ब्यूरो(सीबीआई) ले यो फैसलाविरुद्ध दिल्ली उच्च अदालतमा अपिल गरेको थियो ।

यसका अलावा क्याप्टेन भागमल, पूर्व पार्षद बलवान यादव तथा गिरधारी लाललाई पनि जन्मकैदको सजाय सुनाइएको छ । समाचार एजेन्सी पीटीआईका अनुसार न्यायाधीश एस मुरलीधर तथा विनोद गोयलले यो विषयमा २९ अक्टोबरमा सुनुवाइ सकेका थिए ।

के हो घटना ?

सन्  १९८४ अक्टोबर ३१ मा तत्कालीन भारतीय प्रधानमन्त्री इन्दिरा गान्धीलाई उनकै  सुरक्षाकर्मीले हत्या गरेका थिए । 

यो मुद्दा दिल्ली छावनी क्षेत्रमा पाँच जना सिख व्यक्तिको हत्यासँग पनि जोडिएको थियो । इन्दिरा गान्धीको हत्यापछि दिल्लीको राजनगर क्षेत्रमा केहर सिंह, गुरप्रीत सिंह, रघुविंदर सिंह, नरेन्द्र पाल तथा कुलदीप सिंहको हत्या भएको थियो । 

जगदीश कौर यो घटनाको प्रमुख उजुरीकर्ता तथा प्रत्यक्षदर्शी हुन् । दंगामा उनका श्रीमान केहर सिंह र छोरा गुरप्रीत सिंहको हत्या गरिएको थियो । सन् २००५ मा यो घटनाको सीबीआईले अनुसन्धान थाल्यो । दंगामा कांग्रेस सांसद सज्जन कुमारको प्रत्यक्ष संलग्नता रहेको सीबीआईले अदालतमा बयान दिएको थियो ।