बंगलादेश क्रिकेटका एकदिवसीय कप्तान मशरफे मुर्तजा सांसद बनेका छन् ।

बंगलादेशी प्रधानमन्त्री शेख हसिनाको पार्टी अवामी लिगबाट सांसदमा उठेका मुर्तजा भारी अन्तरले सांसदमा निर्वाचित भएका छन् । उनले आफ्ना प्रतिद्वन्द्वीलाई साढे दुई लाखभन्दा बढी मतले पछि पारेका हुन् । नारायल–२, सिटका उम्मेद्वारा मुर्तजाले दुई लाख ७१ हजार भोट ल्याएका थिए भने उनका विपक्षी जातीय ओइक्यो फ्रन्ट गठबन्धनका उम्मेद्वार फरिदुज्जमा फरहादले जम्म ७,८८३ मत प्राप्त गरेका थिए । 

यसै महिनाको नौ तारिखमा वेष्ट इण्डिजविरुद्धको खेलअघि चुनाव लड्ने घोषणा गरेका मुर्तजाले सन् २०१९ को विश्वकपपछि सन्यास लिने घोषणा गरेका थिए ।

सन् २००९ मा भोगेको इन्ज्युरीपछि उनले टेस्टबाट सन्यास लिएर एकदिवसीयमा ध्यान दिइरहेका छन् । उनले बंगलादेशका लागि ३६ टेस्ट म्याचमा ७८ विकेट लिएका छन् । टि–२० बाट उनले २०१७ बाटै सन्यासको घोषणा गरिसकेका छन् । 

टी–२० मा पनि उनले ५४ खेलमा ४२ विकेट लिएका छन् । बंगलादेश क्रिकेटमा राष्ट्रिय टिममा रहेसँगै सांसद बन्ने मुर्तजा पहिलो व्यक्ति भने होइनन् । यसअघि सन् २०१४ मा नइमुर रहमान दुरजोय पनि क्रिकेट खेल्दै गर्दा सांसद बनेका थिए ।