मुस्ताङमा हिमपात : हवाई, यातायात, सञ्चार सेवा अवरुद्ध

माघ १२, २०७५ शनिबार १३:४९:९ | प्रताप बानियाँ

म्याग्दी – शुक्रबार साँझदेखि भएको वर्षा र हिमपातका कारण हिमालपारीको जिल्ला मुस्ताङमा यातायात र विद्युत सेवा अवरुद्ध भएको छ । वर्षासँगै आएको हिउँ सडकमै जमेपछि बेनी–जोमसोम सडकखण्ड अन्तर्गत मुस्ताङको लेतेमा सडक अवरुद्ध बनेको हो ।

सडकमा हिउँ जमेपछि सवारीसाधन जाममा फसेको हुँदा सवारी आवागमन अवरुद्ध भएको मुस्ताङका सहायक प्रमुख जिल्ला अधिकारी विश्वेश्वर रेग्मीले टेलिफोनमार्फत बताउनुभयो । उहाँका अनुसार हिमपातपछि शुक्रबारदेखि नै मुस्ताङमा केन्द्रीय प्रसारण लाइनको विद्युत सेवा आपूर्ति बन्द भएको छ ।

विद्युत सेवा बन्द भएपछि अहिले उपल्लो मुस्ताङको लोमान्थाङ क्षेत्रमा सञ्चार सम्पर्क विच्छेद भएको उहाँले जानकारी दिनुभयो । यसैगरी जोमसोम विमानस्थलको रनवेमा हिउँ जमेपछि हवाई उडान बन्द भएको सहायक प्रमुख जिल्ला अधिकारी रेग्मीले बताउनुभयो । अहिले पनि निलगिरी हिमाललगायतका डाँडाहरुमा बादल लागेको र हिमपात भैरहेको छ । जोमसोममा झण्डै १ फिटभन्दा बढी हिउँ जमेको छ ।

उपल्लो मुस्ताङको लोमान्थाङ, छोसेर, छोन्हुपसहितका स्थानमा भारी हिमपात भएको र झण्डै २ फिटभन्दा बढी हिउँ जमेको छ । कागबेनी, मुक्तिनाथसहित मुस्ताङका सबै ठाउँमा भारी हिमपात भएको सहायक प्रमुख जिल्ला अधिकारी रेग्मीको भनाइ छ । हिमपातका कारण सवारी आवतजावत र हवाई उडान हुन नसक्ने अवस्था रहेको उहाँले बताउनुभयो । हिमपातपछि चिसो अत्यधिक बढेको बताइएको छ ।

मुक्तिनाथ दर्शन र मुस्ताङ घुम्न पुगेका स्वदेशी तथा विदेशी पर्यटकहरुलाई आवतजावतमा रोक लगाइएको छ । अहिले मुस्ताङमा भारतीय पर्यटकहरु पुगेका छन् । उनीहरुलाई होटलमै बस्न आग्रह गरिएको रेग्मीले बताउनुभयो । चिसो मौसम रहेको हुँदा जुनसुकै समयमा पनि वर्षा र हिमपात हुने भएकाले उनीहरुलाई टाढाको यात्रामा ननिस्कन आग्रह गरिएको छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्