थाई राजा भन्छन् : राजकुमारी प्रधानमन्त्रीको चुनावमा उठ्नु गलत हो

माघ २६, २०७५ शनिबार ७:३८:१६ | एजेन्सी

थाइल्याण्डका राजा वाजीरालोङकोर्नले मार्चमा हुन लागेको प्रधानमन्त्री चुनावमा आफ्नी बहिनीको अप्रत्याशित दावेदारीलाई अनुचित बताउँदै भर्त्सना गरेका छन् ।

राजदरबारबाट सार्वजनिक एक वत्तव्यका अनुसार थाई राजाले आफ्नी बहिनीले उम्मेदवारी दिए त्यो देशको संस्कृतिविरद्ध हुने बताएका छन् ।

६७ वर्षीया राजकुमारी उबोलरत्ना माहीदोललाई पूर्व प्रधानमन्त्री थाक्सिन सिनावात्राको सहयोगी पार्टीले उम्मेदवार बनाउने भएको छ । यो घटनाले थाइल्याण्डको शाही परिवार राजनीतिबाट अलग रहने परम्परा पनि अन्त्य हुनेछ ।

थाइल्याण्डका राजा वाजीरालोङकोर्न

विश्लेषकहरुका अनुसार थाई राजाले हस्तक्षेप गर्दै मार्च २४ मा हुने प्रधानमन्त्री चुनावका लागि राजकुमारीलाई अयोग्य घोषित गर्न सक्नेछन् ।

आउँदो चुनावमा सबैको ध्यान गएको छ । किनकी पाँच वर्षको सैन्य शासनपछि यो चुनावले थाइल्याण्डमा लोकतन्त्रको पुनरागमन हुने धेरैले आशा गरेका छन् ।

थाई राजकुमारीको अभूतपूर्व निर्णय, प्रधानमन्त्रीमा उम्मेदवारी दिने घोषणा

राजदरबारका तर्फबाट सार्वजनिक प्रेस वक्तव्यमा भनिएको छ, ‘उनले आफ्नो शाही पद छाडे पनि उनी चाक्री वंशकी सदस्य हुन् । शाही परिवारका कुनै पनि सदस्य राजनीतिमा आउनु देशको परम्परा, मान्यता तथा संस्कृतिको विरुद्ध हुनेछ ।’वक्तव्यमा संवैधानिक व्यवस्थालाई उद्धृत गर्दै राजपरिवार राजनीतिबाट टाढा बस्नुपर्ने बताइएको छ ।

त्यसभन्दा पहिले राजकुमारी उबोलरत्नाले आफूले प्रधानमन्त्री चुनावमा उम्मेदवारी दिने बताउँदै आफू एक साधारण व्यक्तिजस्तै बस्ने गरेको बताएकी थिइन् ।

उनी थाइल्याण्डका दिवंगत राजा भूमिबोलकी ठूली छोरी हुन् । राजा भूमिबोलको सन् २०१६ मा निधन भएको थियो ।

अमेरिकामा अध्ययन गरेकी राजकुमारीले सन् १९७२ मा अमेरिकी नागरिकसँग विवाह गर्दै आफ्नो शाही पद छोडेकी थिइन् । तर अमेरिकी पतिसँगको डिभोर्सपछि उनी सन् २००१ मा थाइल्याण्ड फर्किइन् । त्यसपछि फेरि थाई शाही परिवारसँग उनको उठबस सुरु भयो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्