च्याम्पियन्स लिगको प्रिक्वार्टरफाइनलको पहिलो लेगमा इटालियन क्लब युभेन्टस एट्लेटिको मड्रिडसँग दूई–शून्यले पराजित भएको छ । 

च्याम्पियन्स लिगको प्रिक्वार्टरफाइनलको खेलमा युभेन्टसविरुद्ध अहिलेसम्मकै ठूलो जित निकालेको एट्लेटिकोका लागि जिमिनेज र गोडिनले एक–एक गोल गरे ।

घरेलु मैदानमा भएको खेलमा डिएगो सिमोनको टिम एट्लेटिकोले पहिलो हाफमा युभेन्टसलाई बराबरीमा रोक्न सफल भयो । ७१ औं मिनेटमा युभेन्टसले गोल गरे पनि भिडियो एसिस्टेन्ट रेफ्रीले त्यसलाई मान्यता दिएन । तर ७८ औं मिनेटमा एट्लेटिकोले खेलमा अग्रता बनायो । जोस जिमिनेजले उत्कृष्ट गोल गर्दै टिमलाई अग्रता दिलाए । 

त्यसपछि ८३ औं मिनेटमा एट्लेटिकोले अग्रता दोब्बर पार्यो । डिएगो गोडिनले सेटपिसमा उत्कृष्ट गोल गर्न सफल भए । दुई गोलले पछि परेको युभेन्टसले त्यसपछि पनि तीन वटा मौका पाएको थियो । जसमा एक पटक क्रिस्टियानो रोनाल्डो असफल भए भने एक पटक फ्रद्रिकोको प्रहारलाई रोकियो । 

खेलको इन्जुरी समयमा फेरि रोनाल्डोको प्रहार पोष्ट नजिकैबाट बाहिरियो । जसका कारण एट्लेटिकोले पहिलो लेगमा दुई गोलको अग्रता लिन सफल भयो । पुरै खेलमा रोनाल्डोले एक दर्जनजति प्रहार गरे पनि गोल गर्न सकेनन् ।

अर्को खेलमा म्यानचेस्टर सिटीले एफसी साल्केलाई तीन–दुई गोलअन्तरले हरायो । १० खेलाडीमा झरेको सिटीको जितमा रहिम स्ट्रलिङले गरेको गोल निर्णायक बन्यो ।

खेलको १८ औं मिनेटमा सर्जियो अगुइरोको गोलमार्फत सिटीले खेलमा अग्रता बनाएको थियो । तर ३८ औं मिनेटमा साल्केले पेनाल्टीको अवसर पायो । जसलाई बेन्टालेबले गोल गर्दै खेल बराबरीमा पुर्याए । त्यसपछि ४५ औं मिनेटमा फेसर सिटीका खेलाडीले फल गर्दा साल्केले अर्को पेनाल्टी पायो । यसपटक पनि बेन्टालेबले गोल गर्दै खेल दुई–एकको अवस्थामा पुर्याए । 

एक गोलले पछि परेका बेला निकोलस ओटामेन्डी दोहोरो पहेलो कार्ड पाउँदै मैदानबाट बाहिरिएपछि सिटी दश खेलाडीमा झर्यो । ८५ औं मिनेटमा सब्स्टिच्यूड खेलाडी लिरोय सानेले गोल गर्दै खेल बराबरी गर्न सफल भए । ९० औं मिनेटमा रहित स्ट्रलिङले गोल गर्दै सिटीलाई पहिलो लेगमा तीन–दुईको जित दिलाए ।