स्वयम्भूनाथदेखि पैदलै कपिलवस्तु आइपुगे धुतांगधारी भिक्षु !

फागुन ९, २०७५ बिहीबार ९:५१:३ | गोपाल भण्डारी

कपिलवस्तु – विश्व शान्तिको कामना गर्दै काठमाण्डौको स्वयम्भूबाट निस्केको धुतांगधारी भिक्षुहरुको टोली बुधबार प्राचीन कपिलवस्तु दरवार क्षेत्र तिलौराकोट आइपुगेको छ ।

थाइल्याण्ड, चीन, रुस, नेपाललगायत देशका ६० जना धुतांगधारी भिक्षुहरु काठमाण्डौ थानकोट, मकवानपुरको कुलेखानी, हेटौँडा, रामग्राम, लुम्बिनी हुँदै कपिलवस्तु आइपुगेका हुन् । झण्डै ४ सय १५ किलोमिटरको दूरी पार गरी उनीहरुले ‘स्वयम्भू टु शाक्यमुनि’ पदयात्रा भिक्षुहरुले सम्पन्न गरेका छन् ।

शान्तिको धर्मदेशना गर्दै भिक्षुहरुले १८ दिनको पदयात्रा पछि फागुन पूर्णिमाका दिन शाक्यमुनि बुद्धले २९ वर्ष बिताएको प्राचीन कपिलवस्तु दरबार क्षेत्रको तिलौराकोट पुगेर यात्रा सम्पन्न गरेको भिक्षु वजीरहले बताउनुभयो ।

पदयात्रामा रहेका भिक्षुहरुलाई कपिलवस्तु जिल्लामा भव्य स्वागत गरिएको छ । सदरमुकाम तौलिहवाका विभिन्न टोलहरुमा भिक्षुहरुलाई भिक्षा दान गरिएको छ । पूर्व राजदूत तथा पूर्व पर्यटन मन्त्री दीपकुमार उपाध्याय, वर्तमान सांसद तथा पूर्व कानुन मन्त्री बृजेशकुमार गुप्ताले यात्रामा रहेका सबै भिक्षुहरुलाई तौलिहवास्थित आ–आफ्ना निवासमा भिक्षा दान गर्नु भएको छ ।

भिक्षुहरुको यस्ता भ्रमणबाट समग्र प्राचीन कपिलवस्तु क्षेत्रको विश्वभर प्रचारप्रसारमा टेवा पुग्ने पूर्व राजदूत उपाध्यायले बताउनुभयो ।

कपिलवस्तु क्षेत्रको विकासको आधार नै बौद्धकालीन पुरातात्विक स्थलहरु रहेको बताउँदै यसको विकास र प्रचारप्रसारमा आफूले सक्दो प्रयास गरिरहेको कपिलवस्तु निर्वाचन क्षेत्र नम्बर २ का सांसद तथा पूर्व कानुन मन्त्री गुप्ताले बताउनुभयो ।

भगवान गौतम बुद्धले ज्ञान प्राप्त गरी सकेपछि ३६ वर्षको उमेरमा २ हजार भिक्षु गणहरुसहित पहिलो पटक आफ्ना माता पितालाई भेट्न कपिलवस्तु आएको स्मरण गर्दै भिक्षुहरु पनि फागुन शुक्ल पूर्णिमाका दिन प्राचीन कपिलवस्तु पुगेका छन् । भिक्षुहरुको रात्रीवासको व्यवस्थापन कपिलवस्तु बहुमुखी क्याम्पसले गरेको क्याम्पस प्रमुख नवराज तिवारीले बताउनुभयो ।

लुम्बिनीबाट तिलौराकोटसम्मको यात्रा व्यवस्थापन र भिक्षाटन व्यवस्थापनका लागि राम प्रसाद कोइराला, तेजकुमार बौद्धाचार्य, ससुमयी शाक्य, माधवप्रसाद शर्मालगायतका समाजसेवीहरुले सहयोग गर्नु भएको थियो ।

कपिलवस्तु पुगेका भिक्षुहरु यात्रा समापनपछि लुम्बिनी फर्केर भारतको कलकत्ता हुँदै थाइल्याण्ड फर्कने कार्यक्रम रहेको भिक्षु वजीरहले बताउनुभयो ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

गोपाल भण्डारी

गोपाल भण्डारी कपिलवस्तुका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्