ओले गुनर सोल्सायरलाई इंग्लिस क्लब म्यानचेस्टर युनाइटेडले स्थायी रुपमा प्रमुख प्रशिक्षक नियुक्त गरेको छ ।

म्यानचेस्टर युनाइटेडले सोल्सायरलाई तीन वर्षका लागि नियुक्त गरेको हो । उनले अन्तरिम प्रशिक्षकको रुपमा डिसेम्बरदेखि म्यानचेस्टर युनाइटेडको टिम सम्हालेका थिए ।

जोसे माउरिन्होलाई बर्खास्त गरेपछि ओले गुनर वल्ड ट्राफोडमा म्यान्यूको टिम सम्हाल्न आएका थिए । १९९९मा भएको च्याम्पियन्स लिगको फाइनलमा विजयी गोल गरेका सोल्सायरले खेलाडी जीवनको रुपमा ११ वर्ष म्यान्यूमा बिताएका थिए ।

स्थायी रुपमा प्रशिक्षक नियुक्त भएपछि सायरले आफूले लामो समय देखि म्यान्यूको नेतृत्व गर्ने सपना देखेको र त्यो पूरा भएको बताएका छन् ।

अन्तरिम प्रशिक्षकमा नियुक्त भए देखि म्यान्यूले प्रिमियर लिगमा उत्कृष्ट प्रदर्शन गर्दै आएकोे छ । उनले क्लब सम्हाल्दा म्यान्यू छैटौं स्थानमा रहँदा शीर्ष चारमा पर्ने टिम भन्दा ११ अंकले पछि परेको थियो ।

उनले टिम सम्हाले पछि प्रिमियर लिगमा म्यान्यूले खेलेका १३ मध्ये १ खेलमा मात्रै पराजय भोगेको छ । तालिकाको पाँचौ स्थानमा रहेको म्यान्यू चौथो स्थानको आर्सनल भन्दा २ अंकले मात्रै पछि परेको छ