भारतमा आम चुनावको मुखैमा ६५० भन्दा बढी थिएटर कलाकारले भारतीय जनता पार्टी(बीजेपी) र उसको सहयोगी दललाई भोट नहाल्न अपिल गरेका छन् । 

गएको बिहीबार थिएटर प्राक्टिसनर्स अफ् इन्डियाका ब्यानरमा कलाकारले बीजेपी र उसको सहयोगी दललाई भोट नदिन अपिल गरेका हुन् । उनीहरुले लोकतन्त्रको रक्षा, प्रेम तथा सौहार्दताका लागि भोट हाल्न पनि अपिल गरेका छन् । 

संयुक्त बयान सार्वजनिक गर्नेमा बलिउडका केही चर्चित हस्ती पनि रहेका छन् । नसीरुद्दीन शाह, रत्ना पाठक शाह, अनुराग कश्यप, कोंकणा सेन शर्मा, लिलेट दुबे तथा माव कौल पनि रहेका छन् ।

थिएटर कलाकारको अपिलभन्दा पहिले झण्डै एक सय चलचित्रकर्मीले एउटा पत्रमा हस्ताक्षर गर्दै बीजेपीलाई भोट नदिन अपिल गरिएको थियो ।

कलाकारको अपिलमा भनिएको छ, ‘नागरिकले प्रेम, समानता तथा सामाजिक न्यायका लागि भोट दिनुपर्छ । जसले नागरिकको दैनिकी सहज होस् र घृणाको राजनीति समाप्त होस् ।’ उनीहरुले बीजेपीले गुण्डागर्दीलाई खुला छुट दिएको र घृणा र हिंसाको राजनीति फैलाएको आरोप पनि लगाएका छन् ।