मोरङ – उद्योगी दिवाकर गोल्छाको निधन भएको छ । उनको मंगलबार राति भारतको चेन्नईमा ६७ वर्षको उमेरमा निधन भएको हो । नेपाल उद्योग वाणिज्य महासंघका उपाध्यक्ष भइसकेका गोल्छाको औद्योगिकरणमा महत्वपूर्ण भूमिका छ ।

उद्योग संगठन मोरङको संस्थापक सदस्य हुँदै उनी उद्योग वाणिज्य महासंघको उपाध्यक्षसम्म भएका हुन्  । २ दर्जन बढी उद्योगको नेतृत्व गरेका उनको  नेपालमा औद्योगिक क्षेत्रमा ठूलो लगानी थियो । उनका हुलास वायर, हुलासका खाद्यान्न, श्रीराम सुगर मिल, इष्टर्न सुगर मिल, हुलास जस्तापातालगायतका ठूलो लगानीमा उद्योग संचालित छन् । 

विराटनगरमा लामो समय बसेका गोल्छा पछिल्लो समय काठमाण्डौको शंखमुलमा बस्दै आएका थिए । गोल्छाको निधनले आधुनिक औद्योगिक क्रान्तिमा ठूलो क्षति भएको उद्योग संगठन मोरङका अध्यक्ष भिम घिमिरेले बताउनुभयो । ‘दिवाकर गोल्छाको निधनसँगै औद्योगिक क्षेत्रले असल अभिभावक गुमाउनु परेको छ ।' उद्योग संगठन मोरङका अध्यक्ष घिमिरेले भन्नुभयो ‘औद्योगिकरणका लागि गोल्छाको योगदान अतुलनीय थियो ।’ 

गम्भीर बिरामी भएका गोल्छाको ‘किड्नी ट्रान्सप्लान्ट’ गरेको दुई सातापछि निधन भएको हो ।

उनी नेपाली कांग्रेसबाट पहिलो संविधानसभा निर्वाचनमा समानुपातिकतर्फबाट सभासद बनेका थिए । उनको शव काठमाण्डौ ल्याई पशुपतिमा अन्त्येष्टि गरिने पारिवारिक स्रोतले जनाएको छ ।