संसदीय समितिले छुट्ट्याउन सकेन सक्कली र नक्कली मसला !

जेठ १०, २०७६ शुक्रबार २०:२३:२९ | रासस

अशोक घिमिरे/रासस ।

काठमाण्डाै - बजारमा छ्याप्छ्याप्ती भएको दुई प्रकारका बीएमसी मसलाले उपभोक्ताको स्वास्थ्यमा प्रतिकूल असर परेको भन्दै दर्ता भएको उजुरीमाथि टुङ्गो लगाउन बसेको संसदीय समितिले कुन मसला सक्कली वा नक्कली हो भनेर छुट्ट्याउन सकेन ।

नक्कली मसलाको टुङ्गो लगाएर सम्बन्धित निकायलाई कारबाहीको निर्देशन दिन आज बसेको प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ताहित समितिको बैठकले सक्कली र नक्कली मसालको भेउ पाउन नसकेपछि समितिनै अलमलमा परेको छ ।

सक्कली मसला पहिचान गर्ने र नक्कली मसलाको आयातकर्तालाई कारबाही गर्ने उद्देश्यले समितिको बैठकमा छलफलका लागि उद्योग, वाणिज्य तथा आपूर्तिमन्त्री, उद्योग सचिव, भन्सार विभागका महानिर्देशकलाई बोलाइएको थियो ।

बीएमसीको नाममा भेटिएको दुई मसलाको प्याकेट झण्डै दुरुस्तै थियो । मसलामा प्रयोग भएका तत्वका नाम एउटै र परिणाम एकै थिए । प्याकेट भने झट्ट हेर्दा उस्तै देखिए पनि गहिरिएर हेर्दा मात्र फरक देखिन्थ्यो । बीएमसी मसला सक्कली की नक्कली भनेर छुट्ट्याउन मन्त्री, सचिव, सांसद् निकैबेर घोत्लिएर पनि समिति निष्कर्षमा पुग्न सकेन ।

छलफलमा सहभागी हुने कोही सांसदले नक्कली मसलाको भन्सार जाँचपास गरेको भन्दै भन्सारतर्फ प्रश्न तेस्र्याए भने कतिले मसलाको गुणस्तर जाँच गरिनुपर्ने बताए । त्यस्तै केही सांसदले भने सक्कली बिएमसी मसालको आयातकर्ताले कारोवार कम देखाउन भन्सार छली गरेर नक्कली मसला भित्र्याएको हुनसक्ने आशङ्कासमेत गरे । बैठकमा केही सांसदले मसलामा मिसावट भएको छ भनेर आफूले मसलाको प्रयोग नै बन्द गरेको सुनाउनसमेत भ्याए ।

समितिमा उजुरी परेकै भरमा अलमल, अस्पष्टताकाबीच बैठकमा बोलाएको भन्दै उद्योगमन्त्री मातृका यादवले रोष प्रकट गर्नुभयो । मन्त्री यादवले नक्कली मसला बजारमा देखिएको बारे सम्बन्धित निकायमा उजूरी आउनुपर्ने बताउनुभयो । मसला नक्कली भएको भन्नेमा मन्त्रालयमा कुनै उजूरी नपरेको उहाँको भनाइ थियो ।

मन्त्री यादवले भन्नुभयो, “कुन मसला नक्कली र सक्कली हो र कुन घातक छ भन्न सक्नुहुन्छ ? बिना प्रमाण कोही बोल्न हुदैन ।” उहाँले खाद्य पदार्थमा हुने मिसावट रोक्न सरकार गम्भीर रहेको बताउनुभयो ।

सांसद कृष्णबहादुर श्रेष्ठले तत्कालै उक्त मसलाको गुणस्तर छानबिन गर्न खाद्य प्रयोगशालामा पठाइनुपर्ने जोड दिँदै परीक्षणपछि मात्र कुन सक्कली र नक्कली हो छुट्टयाउन सकिने बताउनुभयो । सांसद अमृतादेवी अग्रहरीले दैनिक उपभोग्य सामग्रीमा मिसावट भएको जनगुनासो व्यापक आएको उल्लेख गर्दै अखाद्य वस्तु बजारमा आउन नदिन सम्बन्धित निकाय जिम्मेवार बन्नुपर्ने बताउनुभयो । समिति सदस्य गोपाल बमले नेपालमै उत्पादन भए पनि मसला नक्कली भएको पाइएको हुँदा तत्कालै संसदीय उपसमिति बनाएरै छानबिन गरिनुपर्ने बताउनुभयो ।

छलफलमा भन्सार विभागका महानिर्देशक रामेश्वर दङ्गालले नक्कली मसलाको आधिकारिकता जाँच गर्न तत्कालै सबै भन्सार कार्यालयलाई परिपत्र गर्ने उल्लेख गर्दै केही दिनभित्रै समितिलाई जानकारी गराउने बताउनुभयो ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

1 Comments

Alok Shrestha
May 24, 2019, 8:29 p.m.
खाध्य प्रविधि तथा गुण नियन्त्रण विभागले गर्ने काम अरुले गरे पछि कहाँ छुटिन्छ सक्कली नक्कली ।
0 Reply

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

संसदीय समितिले छुट्ट्याउन सकेन सक्कली र नक्कली मसला !

1 Comments

Alok Shrestha

तपाईको प्रतिक्रिया

तपाईको प्रतिक्रिया