पहिरोले संखुवासभामा दर्जनौ घरमा क्षति, ६ घर परिवार विस्थापित

साउन ११, २०७६ शनिबार १४:२३:११ | नवीन गुरुङ

संखुवासभा - केही दिनदेखि परेकाे अविरल वर्षाले संखुवासभाका विभिन्न ठाउँहरुमा दर्जनाैँ घरहरुमा क्षति पुर्‍याएको छ ।

दिनभर आकाश खुले पनि साँझ परेपछि लगातार वर्षा भइरहेकाले जिल्लाको धेरै ठाउँहरुमा पहिरो गएको हो । विभिन्न ठाउँमा बाढीपहिरो जाँदा सर्वसाधारणको लाखौँ रुपैया बराबरको क्षति गरेको जिल्ला प्रहरी कार्यालय संखुवासभाले जनाएको छ । वर्षाले विभिन्न स्थानमा ठूलो मात्रामा क्षति हुनाका साथै पशु-चौपायाको मरेका छन् तर अहिलेसम्म मानवीय क्षति भने नभएको बताइएको छ ।

मानेभञ्जाङ्गमा ६ घर परिवार विस्थापित

पहिरोले खाँदबारी नगरपालिका–३, मानेभञ्जाङमा ६ घर परिवार विस्थापित भएका छन् । विस्थापित हुनेहरुमा टेकबहादुर विश्वकर्मा, कमल तामाङ, कमल घिमिरे, मनबहादुर तामाङ, तिलबहादुर विश्वकर्मा र गंगाप्रसाद शाक्यको परिवार रहेका छन् ।

विस्थापित परिवारहरुलाई अहिले महेन्द्र माध्यमिक विद्यालयको कक्षाकोठामा सारिएको छ । पहिरोले टेकबहादुरको घर भत्काएको छ । घरसँगै रहेको शौचालय, सुँगुरको खोर, बाख्राको खोर समेत बगाएको छ । स्थानीय गंगाप्रसाद शाक्य र तिलबहादुर विश्वकर्माको सुँगुरको खोर बगाएकाे छ । त्यसैगरी मानेभञ्जाङमा घरहरु पनि उच्च जोखिममा परेकाले विस्थापितहरुलाई सुरक्षित स्थानमा सारिएको जिल्ला प्रहरी कार्यालय संखुवासभाका सुचना अधिकारी सन्तोष राईले जानकारी दिनुभयो ।

मानेभञ्जाङ बजार नै उच्च जोखिममा

खाँदबारी–३, मानेभञ्याङ बजार पहिरोको उच्च जोखिममा परेको छ । जथाभावी सडक विस्तारले मानेभञ्याङ बजार नै उच्च जोखिममा परेको हो ।मानेभञ्जाङको दुवै क्षेत्रबाट सडक विस्तार भएका कारण मानेभञ्याङ बजार पहिरोको उच्च जोखिममा परेको स्थानीयहरु बताउँछन् । बजार नजिकको दायाँ पट्टि उत्तर दक्षिण कोशी सडक छ भने बाँयापट्टि खाँदबारी-२, चेवाबेसी जाने सडकले मानेभञ्याङको मुख्य बजार रहेको छ । त्यसैले दुवै क्षेत्रबाट बजारलाई पहिरोले तान्न थालेको वडा नम्बर ३ का कार्यवाहक अध्यक्ष नरेन्द्र गुरुङले बताउनुभयो ।

उहाँले मानेभञ्जाङ बजार क्षेत्रमा मात्रै ५० भन्दा बढी घरहरु उच्च जोखिममा परेको बताउनुभयो । बजारको दुवै क्षेत्र भिरालो भाग र सडक भएका कारण पहिरो झरेकाे हाे। त्यसैले पहिरोले बजारका साथै एक प्रहरी चौकी र विद्यालय भवन समेत उच्च जोखिममा परेका छन् ।

त्यसैगरि चिचिला गाउँपालिका–१, सोभाङटोल बस्ने धनबहादुर राईको घर पहिराेका कारण बस्न जोखिम भएकाले उनकाे तीन जनाको परिवार छिमेकी भिमप्रसाद राईको घरमा बसोबास गरिरहेका छन् । पहिरोले पाँच लाख रुपैयाँ बराबरको क्षति भएको जिल्ला प्रहरी कार्यालय संखुवासभाले जनाएको छ ।

जिल्लामा लाखौँको क्षति

अविरल वर्षाका कारण सिलिचुङ गाउँपालिका–१ मुस्तेनमा गएकाे पहिरोले स्थानीय राजकुमार राईको एक रोपनी मकैबारी पुरिएको छ । त्यसैगरी वडामा रहेको भिमसेन निमावि, सिसुवाखोलामा ढुङ्गा र माटोले बनेको पर्खाल भत्किएर करिब तीन लाख रुपैयाँ बराबरको क्षति भएको संखुवासभाका प्रहरी निरीक्षक राईले बताउनुभयो ।

उहाँका अनुसार, धर्मदेवी नगरपालिका–९, खाल्डे गाँउ बस्ने चित्रकुमार कार्कीको घरनजिकै पहिरोले घर र गोठ भत्काएको छ । खाँदबारी–३, मानेभञ्ज्याङमा पहिरोले रेवन राईको माेटरसाइकल ग्यारेजमा डेढ लाख बराबरको क्षति पुर्‍याएको छ ।

त्यसैगरी, खाँदबारी–४, सेकाहामा भीमबहादुर गुरुङको पाँचकोठे घर पहिरोले पुरेको छ । त्यसैगरी भीमबहादुरको घरसँगै टाँसिएको छिमेकी तेजबहादुर गुरुङ, गौरीमान गुरुङ र भुवनसिंं गुरुङको घर समेत खतरामा परेको प्रहरीको भनाइ छ । ती चारै घरमा नबस्न सुझाव दिइएकाे प्रहरीले जनाएको छ ।

सदरमुकाम खाँदबारी–१ मा निमछिरिङ शेर्पा, डम्बर विश्वकर्मा, राम विश्वकर्मा, गणेश राई, रिदा भोटे र पुण्यप्रसाद पोख्रेलको घर पहिरोको उच्च जोखिममा परेका छन् । खाँदबारी नगरपालिकाभित्र कति घर विस्थापित भए भन्ने यकिन तथ्याङक संकलन गर्ने काम भइरहेको खाँदबारी नगरपालिकाले जनाएको छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्