बाघको आक्रमणबाट बर्दियामा एक जनाको मृत्यु

 भदौ ८, २०७६ आइतबार ११:८:११ | उज्यालो सहकर्मी
unn.prixa.net

बर्दिया – पाटे बाघको आक्रमणबाट बर्दियामा एक जनाको ज्यान गएको छ । ठाकुरबाबा नगरपालिका–१ भुरिगाउँ बजारको खानेपानी ट्याङ्की नजिक ७० वर्षीय पहरिया थारुको पाटे बाघको आक्रमणबाट ज्यान गएको निकुञ्जले जनाएको छ ।

आइतबार बिहान ७ बजेतिर करेसाबारीमा बंगुरलाई चारो राख्न गएका बेला बाघले आक्रमण गरेको ‍स्थानीय देविराम दहितले बताउनुभयो । बाघले आक्रमण गरेको ठाउँदेखि झण्डै २५ मिटर घिसारेर लगेको छ । बाघले मृतकको घाँटीमा हानेको चोट देखिन्छ । थारुको घटनास्थलमै ज्यान गएको प्रहरीले जनाएको छ ।  

बर्दिया राष्ट्रिय निकुञ्ज भित्रबाट आएको बाघले आक्रमण गर्दा थारुको ज्यान गएको हो । मृतकको घर र निकुञ्ज सीमाना जोडिएको छ ।

चार दिन अघि बिहीबार दिउँसो पनि बर्दिया राष्ट्रिय निकुञ्ज भित्रबाट आएको बाघले आक्रमण गर्दा गेरुवा गाउँपालिका–४ दङ्गपुरकी ५६ वर्षीय रामकली शाहीको ज्यान गएको थियो ।

अन्तिम अपडेट: भदौ १६, २०७६

तपाईको प्रतिक्रिया