चितवनमा साहसिक खेल 'जिपलाइन' काे सुरुवात

असोज १, २०७६ बुधबार २०:४३:३० | राधेश्याम खतिवडा

चितवन – चितवनको जलदेवी सामुदायिक वनमा साहसिक खेल 'जिपलाइन' सञ्चालनमा आएको छ । नेपाल भ्रमण वर्ष २०२० लाई सफल बनाउनको लागि सामुदायिक वनले पर्यटकलाई आकर्षित गर्न 'जिपलाइन'को सुरु गरेको हो ।

प्रदेश ३ का पर्यटन मन्त्री अरुण नेपालले एक कार्यक्रमका बीच 'जिपलाइन'को उद्घाटन गरेसँगै सर्वसाधारणको लागि खुला भएको छ । भ्रमण वर्षलाई लक्षित गर्दै सामुदायिक वनले पर्यटक भित्र्याउन सहयोग पुग्ने उद्देश्यले ‘जिपलाइन’ सञ्चालनमा ल्याएको जलदेवी सामुदायिक वनका अध्यक्ष केशवबहादुर थापाले बताउनुभयो ।

यो खेल चितवनको लागि नयाँ भएको र पर्या-पर्यटनमा काम गर्दै आएको सामुदायिक वनले ‘जिपलाइन’ सञ्चालनमा ल्याएपछि चितवन आउने पर्यटकहरुको बसाइ लम्बिनेमा पर्यटन व्यवसायी ढुक्क देखिन्छन् । सामुदायिक वनको ५१ प्रतिशत र निजी क्षेत्रको ४९ प्रतिशत लगानीमा ‘जिपलाइन’ निर्माणको काम भएको बताउँदै अध्यक्ष थापाले ‘जिपलाइन’बाट आउने कुल नाफा बापतको १० प्रतिशत रकम वनले नै प्रयोग गर्ने जानकारी दिनुभएको छ ।

जलदेवी 'जिपलाइन' परियोजनाअन्तर्गत ७५ लाख रुपैयाँ लगानी भैसकेको र अझै निर्माणका क्रममा रहेकाले झण्डै एक करोड लाग्ने अनुमान गरिएको छ । सामुदायिक वन र वाइल्ड वन्डर्स नेपालको संयुक्त लगानीमा निर्माण भएको जिपलाइन एक वर्ष अघिदेखि निर्माण सुरु भएको थियो ।

'जिपलाइन' खेलमा कम्मरमा विशेष प्रकारको डोरी बाँधेर, चराको पखेटाझैँ हात फैलाएर झण्डै एक मिनेट हावामा उडेको महसुस हुनेगरी ‘सुपरम्यान फ्लाइङ’ गर्न सकिन्छ । साना बालबालिकाका लागि भने छुट्टै 'जिपलाइन' निर्माण गरिएको छ ।

टिकटको मूल्य बालबालिकाका लागि एक सय रुपैयाँ र अरुका लागि पाँच सय रुपैयाँ तोकिएको छ । टिकटमा सात लाख रुपैयाँको बीमा समेत गरिएको अध्यक्ष थापाले जानकारी दिनुभयो । नेपालमा काभ्रे र पोखरामा 'जिपलाइन' खेल भए पनि यो चाहिँ सामुदायिक वनभित्रकै पहिलो जिपलाइन हो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राधेश्याम खतिवडा

राधेश्याम खतिवडा उज्यालोका चितवन सहकर्मी र नेपाल पत्रकार महासंघ चितवन शाखाका पूर्व अध्यक्ष हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्