झुलाघाटमा पक्की पुल बनाउन सरकारले कुनै पहल नगरेकाे भन्दै ३७ दिनपछि अनशन स्थगित

असोज २७, २०७६ सोमबार १८:५१:५९ | जयराज अवस्थी

बैतडी – गएको भदौ २२ गतेदेखि भारतसँग सीमा जोडिएको झुलाघाट नाकामा पक्की पुल निर्माणको माग गर्दै सुरु गरिएको रिले अनशन स्थगित भएको छ ।

झुलाघाटमा पुल निर्माणको माग गरेर अनशन बसेको ३७ औँ दिनसम्म पनि सरकारको तर्फबाट कुनै पनि पहल नभएकाले रिले अनशन स्थगित गर्न बाध्य भएको झुलाघाट पक्की पुल निर्माण संघर्ष समितिले जनाएको छ ।

समितिले सोमबार एक विज्ञप्ति जारी गर्दै आफ्ना मागप्रति सरकारले कुनै प्रतिक्रिया नदिनु निकै दुखदायी र बिडम्बनापूर्ण भएको जनाएको छ ।

झुलाघाटमा पुल निर्माणका लागि बैतडीबासीले दुई दशकदेखि माग गरिरहेको भए पनि सरकारले त्यसतर्फ कुनै ध्यान नदिएको संघर्ष समितिका संयोजक नरबहादुर चन्दले जानी गर्नुभएको विज्ञप्तिमा उल्लेख छ ।

बैतडीबासीले गरेको शान्तिपूर्ण रिले अनशनप्रति सरकारको ध्यान नगएकाले अब संघीय राजधानी काठमाण्डौ केन्द्रित संघर्षका कार्यक्रमहरु तय गर्ने निर्णय भएको विज्ञप्तिमा लेखिएको छ ।

झुलाघाट नाकामा पक्की पुल निर्माण गर्दा सुदूर पश्चिमको समग्र विकासमा टेवा पुग्ने भएकाले यो मुद्दालाई अझै व्यापक बनाइने संघर्ष समितिका संयोजक चन्दले बताउनुभयो । झुलाघाटमा पक्की पुल निर्माणका लागि बैतडी आएका सबै दलका शीर्ष नेताहरुले बेलाबेलामा आश्वासन दिएको भए पनि त्यो अहिलेसम्म पूरा हुन नसकेको चन्दले गुनासो गर्नुभयो ।

अहिले सीमा नाकामा झण्डै डेढ सय वर्षअघि इस्ट इण्डिया कम्पनीले निर्माण गरेको झोलुङ्गे पुलबाट आवतजावत गर्ने गरिएको छ ।

समितिले जारी गरेको प्रेस विज्ञप्तिमा अनशनका समयमा सहयोग गर्ने सबैलाई धन्यवादसमेत ज्ञापन गरेको छ । ३७ दिनसम्म सञ्चालन भएको रिले अनशनमा एक हजार बढी नागरिकले सहभागिता जनाएको संघर्ष समितिले जनाएको छ ।

सरकारको गौरवको आयोजनाअन्तर्गत मध्यपहाडी लोकमार्गको अन्तिम बिन्दु बैतडीको झुलाघाटमा पक्की पुल नभएकै कारण सुदूर पश्चिमको पर्यटनलगायत समग्र आर्थिक क्षेत्रको समृद्धिमा बाधा पुगेको छ ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जयराज अवस्थी

जयराज अवस्थी बैतडीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्