विदेशमा रहेका नेपालीको मताधिकारबारे अध्ययन थाल्न मानवअधिकार आयोगको सुझाव

पुष ३, २०७६ बिहीबार १०:४५:३७ | रासस

काठमाण्डौ – राष्ट्रिय मानव अधिकार आयोगले विदेशमा रहेका नेपाली नागरिक तथा आप्रवासी श्रमिकको मतदानको अधिकारको विषयमा बुधबार निर्वाचन आयोगसँग छलफल गरेको छ ।

आयोगका अध्यक्ष अनुपराज शर्माले मानव अधिकार र आवधिक निर्वाचन लोकतन्त्रको कडी रहेको अवस्थामा लाखौँ सङ्ख्यामा नेपाली नागरिक वैदेशिक रोजगारीका क्रममा रहेका मतदानको अधिकार संरक्षण गर्ने दायित्व सरकार तथा निर्वाचन आयोगको रहेको बताउनुभयो ।

आप्रवासी कामदारको मतदानको अधिकार मानव अधिकारको विषय भएकाले अन्य देशको अनुभव अध्ययन गरी प्रक्रिया अगाडि बढाउनुपर्ने उहाँको सुझाव थियो ।
निर्वाचन आयोगका प्रमुख आयुक्त दिनेशकुमार थपलियाले विदेशमा रहेका नेपालीको मतदानको अधिकारको विषयमा मानव अधिकार आयोगको सिफारिस, सर्वोच्च अदालतको परमादेश र कार्यदलको अध्ययन प्रतिवेदनको सुझावलाई निर्वाचन आयोगले संवेदनशील रूपमा लिएर ऐन संशोधनको प्रक्रिया अगाडि बढाएको जानकारी दिनुभयो ।

निर्वाचन ऐन मस्यौदा तयार भइरहेको अवस्थामा आयोगले सरकारलाई सिफारिस तथा उक्त विषयमा बहस चलाएर सहयोग गर्न आग्रह गर्नुभयो ।

आयोगद्वारा विमानस्थलको अनुगमन

राष्ट्रिय मानव अधिकार आयोगले आज अन्तर्राष्ट्रिय आप्रवासी दिवसका अवसरमा विमानस्थलको अनुगमन गरेको छ । आयोगकासदस्य सुदीप पाठक नेतृत्वको टोलीले अन्तर्राष्ट्रिय विमानस्थलको श्रम, अध्यागमन तथा सुरक्षा जाँचबुझ कक्षको अनुगमन गरेको हो ।

अनुगमनका क्रममा वैदेशिक रोजगारमा जाने कामदारसँग वैदेशिक रोजगारीमा जाने क्रममा अपनाइएका प्रक्रिया, आवश्यक कागजात प्राप्त गर्न लागेको समय एवं उनीहरूले भोग्नुपरेका समस्या, कानूनी प्रक्रिया तथा न्यायमा पहुँचका बारेमा सोधपुछ गरी जानकारी लिएको थियो ।

फ्री भिसा, फ्री टिकटको पूर्ण कार्यान्वयन नभएको, तालीम तथा अभिमुखीकरणको अभावले गन्तव्य देशको स्थानीय भाषा, संस्कृति एवं कानूनको पर्याप्त जानकारी नभएको, कामदारमा दक्षताको अभाव रहेको, कतिपय कामदारसँग करारपत्र नभएको, विशेषगरी महिला कामदारलाई कामका बारेमा जानकारी नभएको र समस्या पर्दा कहाँ कसरी सम्पर्क समन्वय गर्ने भन्ने विषयमा जानकारी नभएको लगायतका तथ्य अनुगमनका क्रममा पाइएको आयोगले जनाएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्