काठमाण्डौ - पर्साको ठोरीमा बाटो मर्मत गरिरहेको ठोरी गाउँपालिकाको डोजर चितवन राष्ट्रिय निकुञ्जको सुरक्षार्थ खटेको नेपाली सेनाले नियन्त्रणमा लिएको छ । 

ठोरीको ठुटे खोलामा बाटो मर्मत गरिरहेको गाउँपालिकाको डोजर र त्यसका चालक साजन श्रेष्ठलाई सेनाले नियन्त्रणमा लिएको गाउँपालिकाका अध्यक्ष पिएल श्रेष्ठले जानकारी दिनुभयो ।

आवत जावत गर्न सडक मर्मत भइरहेको ठाउँमा पुगेर सेनाको टोलीले डोजर र चालकलाई नियन्त्रणमा लिएर लगेको उहाँले जानकारी दिनुभयो । वडा नम्वर २ पर्ने ठुटे खोलामा सडक मर्मत भइरहेको र काममा अवरोध नगर्न सेनालाई आग्रह गरेको भए पनि जबर्जस्ती नियन्त्रणमा लिएर गएको ठोरी गाउँपालिका वडा नम्वर २ का वडा सदस्य श्यामहरि आचार्यले बताउनुभयो ।

नियन्त्रणमा लिएको डोजर र चालकलाई सेनाको इच्छानगर पोष्टमा राखेको छ । चितवन र पर्सा राष्ट्रिय निकुञ्जको मध्यवर्ती क्षेत्रमा रहेको ठोरीमा चितवन राष्ट्रिय निकुञ्ज प्रशासनले विकास निर्माणका बेला जहिल्यै पनि अवरोध गर्ने गरेको स्थानीयको आरोप छ ।

निकुञ्ज सुरक्षार्थ रहेको सेनाले भने अहिले खोलामा गोहीले अण्डा पार्ने समय भएकाले डोजर र चालकलाई नियन्त्रणमा लिएको जनाएको छ ।