ललितपुर – जावलाखेलमा रहेको सदर चिडियाखाना त जानु भएकै होला । चिडियाखानामा एक सय १४ प्रजातिमा विभिन्न जनावर राखिएको छ । तर केही जनावर भने रातकाे समायमा मात्र सक्रिय हुन्छन् । 

रातकाे समयमा सक्रिय हुने जनावरलाई दिउँसोको बेला आक्कलझुक्कल मात्र देख्न सकिन्छ । राति सक्रिय हुने जनावर अवलोकनको लागि चिडियाखानाले बेलाबेला विद्यार्थी र निश्चित व्यक्तिका लागि अवसर दिने गर्छ । यस वर्ष पनि २४औँ वार्षिकोत्सवको अवसरमा चिडियाखानाले सञ्चारकर्मीका लागि अवलोकनको व्यवस्था गरेको थियो ।

६ हेक्टर क्षेत्रफलमा फैलिएको सदर चिडियाखामा अहिले एक सय १४ प्रजातिका वन्यजन्तु छन् । राणा प्रधानमन्त्री जुद्धशमसेरले विक्रम संम्बत् १९८९ सालमा आफ्नो मनोरञ्जनका लागि सञ्चालनमा ल्याएको चिडियाखाना २०११ देखि सबैका लागि खुला गरिएको हो । 

सोमबार वार्षिकोत्सवका समारोहमा वन तथा वातावरण मन्त्री शक्तिबहादुर बस्नेत, सचिव विश्वनाथ वली, राष्ट्रिय निकुञ्ज तथा वन्यजन्तु संरक्षण विभागका महानिर्देशक गोपालप्रकाश भट्टराई लगायतले चिडियाखानाले वन्यजन्तु संरक्षण, अनुसन्धानसँगै वन्यजन्तुको उद्धारमा पनि महत्वपूर्ण काम गरेको भन्दै प्रशंसा गर्नुभयो ।