काठमाण्डाै - शहीद स्मारक ए डिभिजन लिगमा मनाङ मर्स्याङदी क्लवले आफ्नो अपराजित यात्रालाई कायम राखेको छ ।

फ्रेन्ड्स क्लवसँग एक एक गोलको बराबरी खेलेको मनाङ फेरि शीर्ष स्थानमा उक्लिएको छ । एन्फा क्म्प्लेक्स मैदान सातटोबाटोमा भएको खेलको ११ औँ मिनेटमा पाएको कर्नरको सदुपयोग गर्दै मनाङले अग्रता लिएकाे थियो ।

जगदिश श्रेष्ठको कर्नरमा रन्जन बिष्ठले उत्कृष्ट हेडिङ गोल गर्दै मनाङलाई अग्रता दिलाए । पहिलो हाफमा १–० ले अग्रता बनाएको मनाङले दोस्रो हाफमा अग्रता जेगाउन सकेन ।

फ्रेण्ड्सका लागि खेलको ६२ औँ मिनेटमा उत्तम राईले गोल गरे । उनले कर्नरबाट आएको बलमा उत्कृष्ट हेडिङ गोल गरे । साेमबार नै भएको पहिलो खेलमा न्युरोड टिमलाई १–० ले पराजित गर्दै मछिन्द्र क्लबले पनि अपराजित यात्रा कायम राखेकाे छ ।