भारतले महली सागर बाँध बन्द गरेपछि नेपालीको ३ सय हेक्टर धानखेत डुब्यो

साउन ५, २०७५ शनिबार १६:२८:२८ | गोपाल भण्डारी

कपिलवस्तु – भारतले एक पक्षीय ढंगबाट निर्माण गरेको महली सागर बाँधका कारण कपिलवस्तु जिल्लाको सीमावर्ती क्षेत्रका करिब ३ सय हेक्टर धान खेत डुबानमा परेको छ ।

सीमावर्ती क्षेत्रको महली सागर बाँधका १५ वटा सबै ढोकाहरु बन्द गरिएका कारण नेपालपट्टीको खेतीयोग्य जमिन डुबानमा परेको हो । यशोेधरा गाउँपालिकाको लोहरौली गाउँदेखि भारतीय सीमा क्षेत्रसम्म र सोही गाउँपालिकाको भगवानपुर गाउँदेखि पूर्व रंगपुर गाउँसम्मको खेतीयोग्य क्षेत्र डुबानबाट प्रभावित बनेको छ ।

डुबानका कारण कृषकहरुले समयमै धान खेती लगाउन नपाउने भएका छन् भने लगाएको धानबाली डुबानका कारण गलेर पूर्ण नष्ट भएको छ । भारतीय बाँधका कारण यशोधरा गाउँपालिकाको भगवानपुर, लोहरौली, मुडिला, भैसहिया, रंगपुर गाउँ र परसोहिया गाउँको करिब ३ सय खेतीयोग्य जमिन डुबानमा पर्दै आएको छ ।

वर्षभरि खेती गरेर परिवार पाल्ने धान खेत तालमा परिणत भएपछि सीमावर्ती क्षेत्रका नागरिक निकै चिन्तित बनेकोे स्थानीय कृषक टुंगनाथ बढईले बताउनुभयो ।

मसैया नालाबाट आएको पानीलाई भारतीय पक्षले सीमा क्षेत्रमा महलीसागर बाँधको निर्माण गरेर पानी रोक्न थालेपछि वर्षौदेखि कृषकहरुले डुबानको समस्या भोग्दै आएका हुन् । कृषकहरुलाई डुबानका कारण खेती गर्न पाउने नपाउने चिन्ता त छ नै, अझ बढी चिन्ता त रोपेको धान डुबानका कारण गलेर पूर्ण नष्ट हुँदाको छ ।

सीमा क्षेत्रमा देखिएको यस्तो समस्या समाधानका लागि आफूले आफूभन्दा माथिल्लो स्तरमा कुरा राख्ने र समाधानका लागि निरन्तर आवाज उठाउने यशोधरा गाउँपालिकाका प्रमुख गिरिजेशकुमार पाण्डेयले बताउनुभयो । भारतीय पक्षबाट हरेक वर्ष जस्तै यस वर्ष पनि बाँध मर्मतका नाममा महली सागर बाँधको ड्यामको उचाई थपिँदै गएको छ । हरेक वर्ष भारतीय पक्षबाट यसरी बाँध मर्मत गर्दै जाने र उचाईं बढाउंदै जाँदा सीमावर्ती क्षेत्रका नेपाली कृषकको डुबान समस्या झन् बढेर गएको छ ।

यसका साथै जिल्लाको मायादेवी गाउँपालिका ८ स्थित बरकुल, बिजुवा, जमुनी, र हरिवंशापुर गाउँका कृषकहरुले पनि डुबानको प्रत्यक्ष मारमा पर्दै आएका छन् ।
जिल्लाको डुबान समस्याका बारेमा बुझ्न सांसद बृजेशकुमार गुप्ता, प्रदेशसभा सदस्य धरमबहादुर लाल श्रीवास्तवसहितको टोली डुबान स्थल पुगी डुबानको अवस्था अनुगमन गरेका छन् । सांसद गुप्ताले यो समस्या समाधानका लागि केन्द्र सरकार मार्फत प्रयास गर्ने बताएका छन् ।

यसै गरी प्रदेशसभामा कृषकहरुको डुबान समस्यालाई उठान गरी डुबान पीडित कृषकहरुलाई राहत प्रदान गर्ने कार्यक्रम ल्याउन आफूले कृषकहरुका तर्फबाट खबरदारी गर्ने प्रदेशसभा सदस्य श्रीवास्तवले बताउनुभयो ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

गोपाल भण्डारी

गोपाल भण्डारी कपिलवस्तुका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्