काठमाण्डौ - राष्ट्रिय मानव अधिकार आयोगले चीनमा रहेका नेपालीहरुलाई यथाशीघ्र नेपाल फर्काउन निर्देशन दिएकाे छ ।

सरकारको ध्यानाकर्षण गराउँदै आयोगले चीनमा रहेका नेपालीहरुको उद्धारकाे प्रक्रिया अघि बढाउन निर्देशन दिएकाे हो । आयोगका अध्यक्ष अनुपराज शर्माले स्वास्थ्य मन्त्रालय र प्रधानमन्त्री तथा मन्त्रिपरिषद् कार्यालयले नेपालीहरुको यथाशीघ्र उद्धार गर्नुपर्ने बताउनुभयो । 

‘अभिभावकले स्वास्थ्य मन्त्रालय निकम्मा भयो भन्छन् । हाम्रा आफन्त भोकभोकै त्रासमा बसेका छन् । तर मन्त्रालयले याे मितिमा ल्याउँछौँ भनेर स्पष्ट जवाफ दिन मान्दैन भन्ने गुनासाे गरेका छन्’, शर्माले भन्नुभयाे ।     

अहिले अभिभावकहरु दिनहुँ आफ्ना आफन्तको गुहार माग्दै सरोकारवाला निकायसमक्ष पुगिरहेकाे उहाँले बताउनुभयाे । 

यसैबीच कोरोना भाइरस प्रभावित चीनको वुहानमा रहेका नेपालीलाई स्वदेश फर्काउन अझै केही दिन लाग्ने भएको छ ।

सरकारले उनीहरुलाई ल्याएर राख्ने ठाउँको टुङ्गो लगाए पनि ती ठाउँमा राख्न केही प्राविधिक तयारी गर्न बाँकी रहेकाले अझै समय लाग्ने स्वास्थ्य तथा जनसङ्ख्या मन्त्रालयले जनाएको छ ।