काठमाण्डौ - प्रधानमन्त्री एवं नेपाल कम्युनिस्ट पार्टीका अध्यक्ष केपी शर्मा ओलीलाई नेकपाका अर्का अध्यक्ष पुष्पकमल दाहाल प्रचण्डले भेट गर्नुभएको छ । 

प्रधानमन्त्री ओलीलाई भेट्न अध्यक्ष प्रचण्ड शनिबार बिहान प्रधानमन्त्री निवास बालुवाटार पुग्नुभएको हो । प्रधानमन्त्री ओली त्रि.वि. शिक्षण अस्पतालबाट १२ दिनपछि शुक्रबार बेलुका बालुवाटार फर्किनुभएको थियो ।  

चिकित्सकहरुको टोलीले फागुन २१ गते प्रधानमन्त्री ओलीमा मिर्गौला प्रत्यारोपण गरेको थियो । प्रचण्डले भेट्नुभएको केही समयपछि नेकपाका वरिष्ठ नेता माधवकुमार नेपालले ओलीलाई भेटेर स्वास्थ्य लाभको कामना गर्नुभएको छ ।

यसअघि नेकपाका प्रवक्ता नारायणकाजी श्रेष्ठ, उपप्रधानमन्त्री एवं रक्षामन्त्री ईश्वर पोखरेल र स्वास्थ्यमन्त्री भानुभक्त ढकालले पनि शुक्रबार प्रधानमन्त्री ओलीलाई भेट गर्नुभएको थियो । 

शुक्रबारको भेटमा प्रधानमन्त्री ओलीले कोरोना भाइरसको सङ्क्रमण रोकथामबारे चासो राख्नुभएको थियो । त्यस अवसरमा ओलीले आफ्नो स्वास्थ्यमा सुधार हुँदै गएकोले आफ्ना कामहरुलाई अघि बढाउने बताउनुभएको प्रधानमन्त्रीका प्रेस सल्लाहकार सूर्य थापाले जानकारी दिनुभयो ।