काठमाण्डौ - देशकै एकमात्र निजामती कर्मचारी अस्पतालमा कोरोना भाइरस (काेभिड १९) परीक्षणका लागि स्वाब सङ्कलन बुथ राखिएको छ ।काठमाण्डौको नयाँ बानेश्वरमा रहेको निजामती कर्मचारी अस्पतालमा राष्ट्रिय आविष्कार केन्द्रमा निर्माण भएको स्वाब सङ्कलन बुथ राखिएको हो । 

राष्ट्रिय कर्मचारी सङ्गठन निजामती र भौतिक पूर्वाधार तथा यातायात मन्त्रालयका कर्मचारीहरुको सहयोगमा स्वाब सङ्कलन बुथ राखिएको अस्पतालका कार्यकारी निर्देशक प्राध्यापक डाक्टर दीर्घराज आरसीले बताउनुभयो । 

उहाँले कोरोना भाइरसको आशङ्का लागेका बिरामीहरुको स्वाब सङ्कलन लागि निर्माण गरिएको बुथ प्राप्त भएकोले स्वाब सङ्कलन गर्दा चिकित्सक एवं स्वास्थ्यकर्मीलाई हुने सङ्क्रमणको जोखिम कम हुने बताउनुभयो ।

त्यस्तै यसको प्रयोगबाट स्वास्थ्यकर्मीले लगाउने पीपीईलगायतका अन्य स्वास्थ्य सामग्रीको बचत हुने समेत बताउनुभयो । स्वाब सङ्कलन बुथ पाएसँगै अस्पतालले कोरोना भाइरस सङ्क्रमणको आशङ्का गरिएका बिरामीहरुलाई पनि राम्रो सेवा दिन सक्ने उहाँले बताउनुभयो ।

स्वाब सङ्कलन बुथ उपलब्ध गराउँदै सडक विभागका महानिर्देशक केशवकुमार शर्माले अस्पतालले सुरक्षित रुपमा बिरामीको स्वाब सङ्कलन गर्न यसले सहयोग पुर्‍याउने बताउनुभयो । 

बुथमा प्रयोग गरिएका सामग्रीहरु गुणस्तरीय रहेको र बुथभित्र राम्रोसँग हावा पास हुने व्यवस्थालाई सुरक्षित बनाइएको केन्द्रले बताएको छ ।