भारतमा एकैदिन १९ हजार बढीमा कोरोना सङ्क्रमण

 असार १४, २०७७ आइतबार १५:१०:२५ | उज्यालो सहकर्मी
unn.prixa.net

काठमाण्डौ – भारतमा एकैदिन झण्डै २० हजार जनामा कोरोना भाइरसको सङ्क्रमण देखिएको छ । भारतको केन्द्रिय स्वास्थ्य मन्त्रालयका अनुसार पछिल्लो २४ घण्टामा १९ हजार नौ सय ६ जना कोरोनाका नयाँ बिरामी थपिएका हुन् । 

भारतीय स्वास्थ्य मन्त्रालयका अनुसार एकैदिनमा सङक्रमित हुनेको यो सङ्ख्या अहिलेसम्मकै धेरै हो । 

साथै पछिल्लो २४ घण्टामा कोभिड–१९ सङ्क्रमणको कारण चार सय १० जनाको ज्यान गएको मन्त्रालयले जनाएको छ । योसँगै भारतमा कोरानाको कारण मृत्यु हुनेको सङ्ख्या १६ हजार ९५ पुगेको छ । 

भारतमा अहिलेसम्म पाँच लाख २८ हजार आठ सय ५९ जनामा सङ्क्रमण देखिएको छ । तीन लाख नौ हजारभन्दा धेरै कोरोनामुक्त भएर घर फर्किएको र सक्रिय सङ्क्रमितको सङ्ख्या दुई लाख तीन हजारभन्दा धेरै छ । 
भारतीय स्वास्थ्य मन्त्रालयका अनुसार कोभिड–१९ सङ्क्रमणलाई जितेर स्वस्थ हुने दर ५८ दशमलव १३ प्रतिशतको स्तरमा पुगेको छ । 

कोरोनाबाट भारतको महाराष्ट्र, तमिलनाडु, दिल्ली, तेलङ्गाना, गुजरात, उत्तर प्रदेश, आन्ध प्रदेश र पश्चिम बङ्गाल राज्य सबैभन्दा धेरै प्रभावित भएका छन् । यी राज्यले कुल सक्रिय सङ्क्रमितको ८५ दशमलव ५ प्रतिशत र कुल मृतकको ८७ प्रतिशत हिस्सा ओगटेको छ । 

यसैबीच केन्द्र सरकारले कोभिड–१९ रोकथाम र प्रबन्धनको लागि राष्ट्रिय राजधानी क्षेत्र दिल्लीलाई सहयोग गरेको छ । दिल्लीमा एक हजार शय्याको नयाँ अस्पताल चाँडै नै सुरु गरिने बताइएको छ । 

कोरोनाको प्रकोप बढ्दै गएपछि दिल्लीमा कोभिड–१९ कन्टेनमेन्ट जोनको सङ्ख्या दुई सय ८० बाट बढेर चार सय १७ पुगेको छ । 

दिल्लीको कन्टेनमेन्ट जोनमा रहने ४५ हजारसहित अन्य झण्डै दुई लाख नागरिक कोभिड–१९ जाँचको लागि गइसकेको बताइएको छ ।

अन्तिम अपडेट: असार १४, २०७७

तपाईको प्रतिक्रिया