‘बाढी पहिरो हेर्न जाँदा ज्यानै जाला, ख्याल गर्नुहोस् !’

साउन ७, २०७७ बुधबार ९:७:१३ | जानुका दुवाडी

काठमाण्डौ - गएको असार ३० गते स्याङ्जा कालीगण्डकी गाउँपालिका-४ खहरे लाँकुरी थोकमा पहिरो हेर्न जाँदा अर्को पहिरो खसेर एक जनाको ज्यान गयो ।सँगै पहिरो हेर्न गएका अरु केही घाइते पनि भए ।

साउन ६ गते सर्लाहीमा वाग्मती नदीको बाढीमा फसेका २ जनाको सकुशल उद्धार भयो । नदीमा दाउरा झिक्न गएका स्थानीय २४ वर्षीय डेटमान गोले र १६ वर्षीय निरज तितुङ्ग खोलाको बीच भागमा फसेपछि उहाँहरुको प्रहरीले उद्धार गरेको हो ।

लगातारको वर्षाले देशभर बाढी तथा पहिरोको जोखिम बढ्दै गएको छ । कतिपयको जोखिम थाहा नपाएर वा सावधानी अपनाउँदा अपनाउँदै ज्यान गएको छ । कतिपय भने रमाइलोका लागि बाढी पहिरो हेर्न जाने, सेल्फी खिच्नेलगायतका कारणले गर्दा जोखिममा पर्ने गरेका छन् ।

सामाजिक सञ्जालमा बाढी पहिरो हेर्न जानेको भिड लागेका तस्बिर सार्वजनिक भैरहेका छन् । सरकारले जोखिमयुक्त ठाउँमा नजान आग्रह गरे पनि कतिपय मानिस के रहेछ भन्दै पुलको माथि र बाढी पहिरो गएको स्थानमा जाने गर्छन् । अहिले नारायणी नदी हेर्न पुलमाथि घुइँचो लागेको फोटो सामाजिक सञ्जालमा आइरहेको छ ।

जोखिमयुक्त ठाउँहरुमा मानिसको भिडभाड भएका तस्बिरहरुले आफूहरुको ध्यान केन्द्रीत गरेको मौसम पूर्वानुमान महाशाखाका मौसमविद् समिर श्रेष्ठले बताउनुभयो । मौसम प्रतिकूल रहेको अवस्थामा बाढी पहिरो गएका ठाउँ र पुलको माथि जाँदा आफैंलाई हानी हुने हुँदा त्यस्तो नगर्न उहाँको आग्रह छ ।

मौसमविद् श्रेष्ठका अनुसार नदी तथा खोलाको माथिल्लो क्षेत्रमा पानी परेको बेलामा र तटीय क्षेत्रमा पानी नपरेको अवस्थामा एक्कासी बाढी आएर बगाउने जोखिम हुन्छ । त्यस्तै कतिपय ठाउँमा भरुवा माटो हुने र थाहा नहुने हुँदा भास्सिने जोखिम हुन्छ ।

कतिपय मानिसहरु काठ संकलन गर्न र सेल्फी खिच्न खोला/नदीमा जाँदा बगाएर ल्याएको काठ वा धारिलो धातुले चोटपटक लाग्ने जोखिम हुने हुँदा यस्ता कार्यहरु नगर्नसमेत मौसमविद् श्रेष्ठले आग्रह गर्नुभएको छ । जोखिम भएका ठाउँका मानिसहरुलाई अति आवश्यक प्राथमिक उपचार, नियमित सेवन गर्नुपर्ने औषधि र खानेपानीको जोहो गरेर राख्नुपर्ने उहाँको सुझाव छ ।

पहिरोविद् डा.सुबोध ढकाल सुरक्षाकर्मी र तालिमप्राप्त उद्दारकर्ताहरुबाहेक अरु त्यस्तो जोखिमयुक्त ठाउँमा जान नहुने बताउनुहुन्छ । तालिमप्राप्त व्यक्तिहरुलाई जोखिमबारे ज्ञान हुँदा अप्ठ्यारो अवस्था आईहाले पनि बाहिर निस्कन सक्छन् । तर सामान्य मानिसको ज्यानसमेत जाने हुन्छ । भिरको मुनि र ढुंगा माटो खस्ने ठाउँमा सकेसम्म नहिँड्न पहिरोविद् ढकालको सुझाव छ ।

उहाँ भन्नुहुन्छ, ‘यदि पहिरो खस्न सुरु भए, खस्ने जोखिम देखिए अशक्त, वृद्ध र बालबालिकाहरुलाई पहिलो प्राथमिकता दिएर सुरक्षित ठाउँमा लैजानुपर्छ र आफू पनि सुरक्षित ठाउँमा जानुपर्छ ।’ उहाँ थप्नुहुन्छ, ‘यस्तो अवस्थामा मोबाइल वा अन्य वस्तु छुट्यो, केही हुँदैन भनेर फर्केर जोखिम ठाउँमा जाँदा पनि खतरा हुन्छ, त्यस्तो गर्नु हुँदैन ।’

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जानुका दुवाडी

जानुका दुवाडी उज्यालाेमा कार्यरत हुनुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्