कोशी अस्पतालकाे ओपीडी सेवा अनिश्चितकालका लागि बन्द

साउन १५, २०७७ बिहीबार १५:२१:५१ | सुमन तिमल्सिना

माेरङ – कोशी अस्पतालका चार जना स्वास्थ्यकर्मीलाई कोरोनाको सङ्क्रमण देखिएपछि अस्पतालको बहिरङ्ग सेवा (ओपीडी) सेवा अनिश्चितकालका लागि बिहीबारदेखि बन्द गरिएको छ ।

अस्पतालका ओपीडी इन्चार्ज र कार्यालय सहयोगी गरी चार जनामा बुधबार राति कोरोना पुष्टि भएपछि अस्पतालले सूचना जारी गर्दै सेवा बन्द गराएको जनाएको हो ।

स्वास्थ्यकर्मीमा कोरोना पुष्टि भएपछि सङ्क्रमण नफैलियोस् भनेर ओपीडी सेवा बन्द गरिएको अस्पतालले जनाएको छ । धेरै बिरामीको चाप हुने अस्पतालका स्वास्थ्यकर्मीमा सङ्क्रमण पुष्टि भएपछि समस्या देखिएको छ ।

अस्पतालमा औषधि छर्किएर स्यानिटाइज गर्नुपर्ने भएकोले अर्को सूचना जारी नहुनुञ्जेलसम्मको लागि ओपीडी सेवा बन्द गरिएको कोशी अस्पतालका सुपरिटेन्डेन्ट मेसु डाक्टर चुमनलाल दासले जानकारी दिनुभयो ।

यसअघि अस्पतालका एक नर्स र डाक्टरमा कोरोना देखिएको थियो । लकडाउनको बीचमा पनि अस्पतालमा दैनिक ६ सय बढी बिरामी आउने गरेका थिए । अन्य अस्पतालले कोरोनाको बहानामा उपचार बन्द गरेको अवस्थामा पनि कोशीले आफ्नो सेवा सञ्चालन गरेको थियो ।

ओपीडी सेवा बन्द भए पनि आकस्मिक सेवा फिभर क्लिनिक भने बन्द गरिएको छैन । अस्पतालले गेट बन्द गरेर गेटमै ओपीडी सेवा बन्द भएको सूचना टाँसेको छ । अत्यावश्यक बिरामीलाई मात्र गेटबाट छिर्न दिइएको छ ।

सङ्क्रमितको सम्पर्कमा आएका १४ जनामध्ये दुई जनालाई होम क्वरेण्टीन र १२ जनालाई स्थानीय एक होटेलमा निगरानीमा राखिएको अस्पताल प्रशासनले जनाएको छ ।

अन्तिम अपडेट: मंसिर १८, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सुमन तिमल्सिना

सुमन तिमल्सिना मोरङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्