अरुलाई न्याय दिलाउन व्यस्त हिंसा पीडित धनसरी

कात्तिक २०, २०७७ बिहीबार ७:८:१ | इन्द्रसरा खड्का

काठमाण्डाै - कहिले श्रीमान-श्रीमतीका झगडा, कहिले सासु-बुहारीका । जग्गा विवाद, सडक विवाद, घरायसी झैझगडा त कति कति ! बाँकेको राप्ती सोनारी गाउँपालिका ५ चिलरियाकी धनसरी ओली यस्तै विवाद मिलाउन दिनरात व्यस्त हुनुहुन्छ ।

उमेरले ५१ वर्ष पुग्नु भएकी उहाँ २०७४ सालमा भएको पालिकाकाेको चुनावमा तत्कालीन नेकपा माओवादीबाट महिला सदस्यमा निर्वाचित हुनुभयो । जनप्रतिनिधि भइसकेपछि धनसरीको दैनिकी नै फरक भएको छ । पहिले हिंसामा परेका महिलाको लागि न्यायको माग गर्ने उहाँ अहिले आफैं हिंसामा परेका महिलाहरुलाई न्याय दिने ठाउँमा पुग्नु भएको छ ।

‘कोही फोन गरेर घरमै आउँछन्, कसैको घरमै पुग्छु, कतिपय वडा कार्यालयमै आउनुहुन्छ, सकेसम्म सम्झाइ बुझाइ गर्छौँ' धनसरीले भन्नुभयो । दलित, महिलालगायत पछाडि पारिएका वर्ग र समुदायको लागि वडास्तरीय, बस्तीस्तरीय योजनाहरु छनोट गरी गाउँपालिकासम्म पुर्याउने काम भइरहेको उहाँले बताउनुभयो ।

बालविवाह सबैभन्दा बढी

राप्ती सोनारी गाउँपालिकाको वडानम्बर ५ मा बालविवाह बढी हुने गरेको छ । उहाँ भन्नुहुन्छ, ‘पहिले अभिभावकले नै उमेर नपुगेरै छोराछोरीको बिहे गराइदिने चलन थियो भने अहिले केटाकेटी धमाधम आफैं भागेर जान थालेका छन् ।’

राप्ती सोनारीमा चैतदेखि भदौसम्म १३ वटा बालविवाहका उजुरी वडा कार्यालयमा परेका छन् । वडामा बालविवाहको उजुरी परेपछि धनसरी सबैभन्दा पहिले सम्बन्धित घरमै पुगेर केटाकेटी र अभिभावकलाई भेट्नुहुन्छ । ‘अभिभावक र केटाकेटीलाई भेटेर परामर्श दिन्छौँ । कोही मान्छन्, कोही मान्दैनन् । जति गरे पनि बालविवाह नरोकिने भयो । निकै समस्या छ’ उहाँले उज्यालोसित भन्नुभयो ।

‘महिलाले घरभित्रै संघर्ष गर्नुपर्छ’

महिलाले घरभित्र र बाहिर कति दुःख पीडा भोग्नुपर्छ भन्ने धनसरीलाई राम्रैसँग थाहा छ । आमा, काकी, भाउजुहरुले पाएको दुःख उहाँलाई आफ्नै जस्तै लाग्छ । २०४१ सालमा १६ वर्ष हुँदा धनसरीको गाउँका नरेन्द्र ओलीसँग बिहे भयो ।

बिहेपछि उहाँले गाउँका दिदी बहिनीहरुसँग मिलेर महिला सञ्जाल बनाउनु भयो । आफूमाथि भएका अन्याय अत्याचार सहन नहुने भन्दै आवाज उठाउन सिकाउनुभयो । तर गाउँका केही महिला र अरु पुरुषले यो कुरा मन पराएनन् ।

धनसरीका श्रीमान र ससुराले पनि महिलाले घरभित्रको काम गर्ने हो, बाहिर गएर बोल्ने हैन भन्दै बाहिर जान रोक लगाए । धनसरी साँझ बिहान घरको काम गरेर श्रीमान र ससुराको आँखा छलेर समाजसेवामा लागिरहनुभयो।त्यतिबेला फाट्टफुट्ट रुपमा महिलाको क्षेत्रमा काम गर्ने केही संघसंस्था पनि थिए । ती संघसंस्थाले उहाँलाई सहयोग गरे ।

धनसरीले समाजमा गएर अन्यायमा परेका महिलालाई सहयोग गर्न थालेपछि अरु महिलाले पनि साथ दिन थाले । ‘बिस्तारै अरु महिलाले पनि बुझदै गए र मलाई सहयोग गर्न थाले,’ धनसरीले २०४८ सालतिरको कुरा सुनाउनुभयो।

सासुको सहयोग

धनसरीलाई श्रीमान र ससुराले बाहिर जान नदिए पनि सासुले भने सहयोग गर्नुहुन्थ्यो । उहाँ महिला, दलित, जेष्ठ नागरिकका विषयमा कुरा सुन्नुपर्छ, बुझ्नुपर्छ र बोल्नुपर्छ भन्ने पक्षमा हुनुहुन्थ्यो । धनसरीकी सासु पनि महिलालाई बाहिर जान दिनु हुँदैन, छोरीलाई पढाउन हुँदैन भन्ने सोचको विपक्षमा हुनुहुन्थ्यो । त्यतिबेला महिलालाई बढी बोलेको सुन्दा ‘पोथी बासेको राम्रो हुँदैन’ भनिन्थ्यो ।

२०५४ सालमा भएकोे स्थानीय चुनावमा धनसरीकी सासु नामसरी ओली तत्कालीन नेकपा एमालेबाट वडा सदस्यमा निर्वाचित हुनुभयो । सासु सदस्य भएपछि धनसरीलाई काम गर्न केही सहज भयो । ‘सासु सदस्य भएपछि मलाई पनि सजिलो भयो । घरबाहिर जान थालेँ, महिलाका कुराकानी सुन्न थालेँ, त्यसपछि श्रीमान र ससुराले पनि केही भन्नु भएन,’ धनसरीले आफ्नो विगत सुनाउनुभयो ।

धनसरीको आफ्नै कथा

हिंसामा परेका महिलाहरुलाई न्यायसम्म पुर्याउने धनसरीको आफ्नै कथा छ । २०४७ सालदेखि महिला अधिकारका विषयमा आवाज उठाउँदै आउनुभएकी धनसरी अहिले महिलालाई न्याय दिने ठाउँमा भए पनि उहाँ आफैँले भने कहिल्यै न्याय पाउनु भएन ।

२०५२ सालमा तत्कालीन नेकपा माओवादीले सशस्त्र सुरु गरेपछि धनसरीका श्रीमान माओवादी हुनुभयो । सरकारी सेनाको कुटपिट सहँदै धनसरीले घरमा छोराछोरी हुर्काउनुभयो । २०५५ भदौ २ गते धनसरीका श्रीमानलाई दाङबाट सेनाले पक्राउ गरेर ९ महिना बेपत्ता पार्दा उहाँले राष्ट्रिय मानव अधिकार आयोगको सहयोगमा श्रीमानलाई फेला पार्नुभयो ।

२०६३ सालमा देशमा शान्ति भएपछि सरकारी सेनाको डर हट्यो । परिवारसँगै बस्ने आशा भयो । तर धनसरीका श्रीमान अर्को बिहे गरेर भारत गए । वर्षौंदेखि अरु महिलाको लागि न्याय माग्दै आउनुभएकी धनसरी आफैँले न्याय पाउन सक्नु भएन । तर, उहाँ कमजोर भएर भने बस्नु भएन । महिला अधिकारका लागि निरन्तर संघर्ष गर्नुभयो ।

‘हुन त मैले न्याय नै मागिँन । छोराछोरी साथमा थिए, श्रीमानले विश्वासघात गरेपछि के न्याय मागिरहनु’ उहाँले भन्नुभयो । धनसरी भन्नुहुन्छ, ‘अहिले शान्ति छ । तत्कालीन माओवादीबाटै म महिला सदस्य भएँ । द्वन्द्वकालमा शरीरमा लागेका घाउ त अहिले बिर्सिसकेँ । तर श्रीमानले दिएको पीडा कसरी भुल्नु ?’

(खुल्ला धरती, खुल्ला आकाशबाट)

अन्तिम अपडेट: मंसिर १७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

इन्द्रसरा खड्का

इन्द्रसरा खड्का महिला अधिकार र सामाजिक विषयमा कलम चलाउनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्