काठमाण्डाै – भारतको राष्ट्रिय जनता दल (आरजेडी) का वरिष्ठ नेता शिवानन्द तिवारीले बिहारमा भएको चुनावमा महागठबन्धनको हारको लागि सहयोगी कांग्रेस र उसका नेता राहुल गान्धीलाई जिम्मेवार ठहराएका छन् ।  

शिवानन्द तिवारीले समाचार एजेन्सी एएनआईसँग भने, ‘कांग्रेस महागठबन्धनको लागि खुट्टाको नेल बन्यो । उसले ७० उम्मेदवार मैदानमा उतार्यो तर ७० र्याली पनि गरेन ।’

तिवारीले चुनाव प्रचारको लागि राहुल गान्धी तीन दिनको लागि आएको तर प्रियंका गान्धी एक दिन पनि नआएको बताए । 

उनले भने, ‘यो चुनावमा मेरो पूरै जोड थियो तर राहुल गान्धी सिमलामा प्रियंका गान्धीको घरमा पिकनिक मनाइरहेका थिए, के यस्तो प्रकारले पार्टी चल्छ ?’  

शिवानन्द तिवारीले अघि थपे, ‘कांग्रेस पार्टीले जसरी आफ्नो कारोबार चलाएको छ, त्यसको आधारमा भारतीय जनता पार्टी (बीजेपी) लाई फाइदा पुगिरहेको छ भन्न सकिन्छ ।’

उनको यो स्थिति बिहारमा मात्र नभएको बताए । अरु राज्यमा पनि कांग्रेस धेरैभन्दा धेरै सिटमा चुनाव लड्नको लागि जोड दिने तर जित्न भने नसक्ने तिवारीको भनाइ छ । कांग्रेसले यसबारेमा विचार गर्नुपर्ने उनले बताए । 

पार्टीको स्थितिलाई लिएर कांग्रेसका वरिष्ठ नेताहरुले सोनिया गान्धीलाई लेखेको पत्रबारे पनि उनले चर्चा गरेका छन् ।