योजना छनोटसम्बन्धी विधि तयार नहुँदा समस्या : मुख्यमन्त्री पौडेल

मंसिर १४, २०७७ आइतबार १९:२:२ | रासस

काठमाण्डाै – वाग्मती प्रदेशका मुख्यमन्त्री डोरमणि पौडेलले योजना छनोटसम्बन्धी उपयुक्त विधि तयार नहुँदा विकास निर्माणका काममा समस्या उत्पन्न भएको बताउनुभएको छ ।

वाग्मती प्रदेशको प्रदेश नीति तथा योजना आयोगको चालू आर्थिक वर्षको प्रथम चौमासिक समीक्षा तथा प्रदेश विकास समस्या समाधान समितिको बैठकमा मुख्यमन्त्री पौडेलले परम्परागत मानसिकताका कारण अन्तर सरकार, अन्तर मन्त्रालय तथा अन्तर कार्यालयबीच योजना निर्माण र बजेट वितरणमा प्रशस्त समन्वय हुन नसकेको उल्लेख गर्नुभयो ।

मुख्यमन्त्री पौडेलले समस्याका बारेमा सरोकारवाला सबै भुक्तभोगी र जानकार भए पनि समस्या सुधार गर्न नसकिएको उल्लेख गर्दै देश विकास गर्न चाहने हरेकले आ–आफ्नो क्षेत्रबाट परम्परागत शैलीहरु सुधार गर्न आवश्यक योगदान दिनुपर्ने बताउनुभयो ।

उहाँले वाग्मती प्रदेश सरकारले प्रदेशका सबै क्षेत्रमा काम गरेको बताउनुभयो । पौडेलले प्रदेश सरकारले गरेको कामले धेरै वर्षदेखि सङ्घीय सरकारले गरेका कामलाई छायाँमा पार्न थालेको उल्लेख गर्नुभयो । प्रदेशको सडक, पुल तथा स्वास्थ्य क्षेत्रमा प्रदेश सरकारले प्रशस्त काम गरेको उहाँको भनाइ थियो ।

कार्यक्रममा राष्ट्रिय योजना आयोगका उपाध्यक्ष प्रा.डा. पुष्पराज कँडेलले विकास निर्माणमा सबैभन्दा बिग्रिएको पाटो नै समन्वय भएको बताउनुभयो । उहाँले मन्त्रालय मन्त्रालय तथा सरकार सरकारबीच सहकार्य आवश्यक रहेको उल्लेख गर्दै समन्वयका लागि भूमिका निर्वाह गर्न सबै तयार हुनुपर्ने र आफू पनि आफ्नो क्षेत्रबाट तयार रहेको बताउनुभयो । उहाँले विकास निर्माणको कामलाई कोभिड–१९ ले प्रभाव पारेको बताउँदै यो वर्ष अर्थतन्त्रमा ह्रास आउने तर सबै निकायले उचित भूमिका खेलेर नोक्सानीको मात्रा कम गर्न सकिने धारणा राख्नुभयो ।

प्रदेशका आर्थिक मामिला तथा योजनामन्त्री कैलाश ढुङ्गेलले परियोजना बैंकको उचित प्रयोग तथा व्यवस्थापनबाट मात्र योजना कार्यान्वयनमा सहजता थपिने धारणा राख्नुभयो । प्रदेशका भौतिक पूर्वाधार विकासमन्त्री रामेश्वर फुयाँलले प्रदेश सरकार सुविधाका हिसाबले गाउँ र शहरलाई समान बनाउने दिशातर्फ अग्रसर रहेको र धेरै हदसम्म सफल हुँदै गएको बताउनुभयो ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्