काठमाण्डाै – चीनले औषधि निर्माता कम्पनी सिनोभ्याक बायोटेकलाई झण्डै ५० करोड अमेरिकी डलर अनुदान उपलब्ध गराएको छ । कोरोना भाइरस (काेभिड–१९) विरुद्धको खोप उत्पादनमा सघाउन सरकारले झण्डै ५० करोड अमेरिकी डलर थप अनुदान उपलब्ध गराएको चिनियाँ समाचार संस्था सिन्ह्वाले जनाएको छ ।

गएकाे वर्ष वुहानबाट फैलिएको कोरोना भाइरसलाई चीनले भने नियन्त्रणमा लिइसकेको छ । चीनमा अहिले मात्र दुई सय ८१ जना मात्रै कोरोनाका सक्रिय सङक्रमित छन् । तर चीनले खोप निर्माण गरी विश्वलाई नै उपलब्ध गराउने प्रतिबद्धता जनाएको छ ।

खोप निर्माता सिनोभ्याकले कोरोनाविरुद्धको खोप विकास, क्षमता विस्तार र उत्पादनका लागि चीन सरकारबाट प्राप्त रकम खर्च गरिने जनाएको छ । सिनोभ्याकले छिट्टै ६० करोड डोज खोप उत्पादन गर्न सक्षम हुने जनाएको खबरमा उल्लेख छ ।

चीन सरकारले आपत्कालीन प्रयोगका लागि यो खोपलाई स्वीकृति प्रदान गरिसकेको छ । तर चिनियाँ खोपलाई व्यापक वितरणका लागि नियामक निकायहरूबाट अनुमति प्राप्त गर्न भने बाँकी नै छ ।