काठमाण्डाै – अर्मेनिया र अजरबैजानको विवादित भूमि नागोर्नो–काराबाख क्षेत्रमा युद्धविराम उल्लङ्घन भएको रुसी सेनाले दाबी गरेको छ ।

रुसी सेनाले विज्ञप्ति निकालेर डिसेम्बर ११ अर्थात् गएको शुक्रबार हाद्रुत जिल्लामा युद्धविराम सम्झौताकाे उल्लङ्घन भएको दाबी गरेको हो । तर सम्झौता कुन पक्षले उल्लङ्घन गरेको भनेर आधिकारिक रूपमा खुलाइएको छैन ।

रुसको रक्षा मन्त्रालयले स्वचालित हतियारबाट एकअर्कामाथि आक्रमण गरेको अलजजिराले जनाएको छ । अघिल्लो महिना अर्मेनिया, अजरबैजान र रुसबीच युद्धविरामकाे सम्झौता भएको थियो । नागोर्नो–काराबाखमा शान्ति स्थापनाका लागि रुसी सेना खटिएका छन् ।

युद्धविराम हुनुअघि अर्मेनिया र अजरबैजानबीच झण्डै ६ हप्ता हिंसात्मक क्रियाकलाप भएका थिए । नागोर्नो–काराबाख अजरबैजानको भूमि मानिन्छ । तर अर्मेनियाको पकड छ । युद्धमा अजरबैजानले अर्मेनियाबाट केही भूभाग फिर्ता लिएको थियो ।