काठमाण्डाै – कोरोना खोप अभियानअन्तर्गत नेपालमा अहिलेसम्म एक लाख २८ हजारभन्दा धेरै नागरिकले खोप लगाएका छन् । 

मङ्गलवार बेलुकीसम्म एक लाख २८ हजार ६ सय ५० जनाले कोरोना भाइरसविरुद्धको खोप लगाएको स्वास्थ्य तथा जनसङ्ख्या मन्त्रालयले जनाएको छ । 

अहिलेसम्म प्रदेश नम्बर एकमा १७ हजार दुई सय ८७, प्रदेश नम्बर २ मा १६ हजार एक सय ७३, वाग्मतीमा ४५ हजार तीन सय ४५ जनाले खोप लगाएको मन्त्रालयका प्रवक्ता डा. जागेश्वर गौतमले जानकारी दिनुभयो । 

त्यस्तै गण्डकीमा १६ हजार दुई सय ७०, लुम्बिनीमा १७ हजार नौ सय ७९, कर्णालीमा ६ हजार ६ सय ६० र सुदूरपश्चिममा आठ हजार नौ सय ३६ जनाले खोप लगाएका छन् । 

भारत सरकारले अनुदानमा उपलब्ध गराएको काेभिशिल्ड खोप यही माघ १४ गतेदेखि देशभर एक सय ८५ खोप केन्द्रबाट अग्रपङ्क्तिमा काम गर्ने स्वास्थ्यकर्मीसहित अन्यलाई दिन थालिएको हो । मन्त्रालयले पहिलो चरणमा प्राथमिकता प्राप्त लक्षित समूहमा पर्ने व्यक्तिमध्ये स्वास्थ्यकर्मीले काउन्सिल दर्ता, आधिकारिक परिचय पत्र र संस्थाबाट प्रमाणीकरण गरेको विवरण तथा अन्य व्यक्तिका हकमा सम्बन्धित कार्यालयले गरेको सिफारिस पत्र जिल्लाको स्वास्थ्य कार्यालयमा नाम दर्ता गरि खोप लगाउन आग्रह गरेको छ ।

स्वास्थ्य सेवा विभागको बाल स्वास्थ्य तथा खोप शाखा प्रमुख डाक्टर झलक शर्मा गौतमले कोभिशिल्ड सुरक्षित र प्रभावकारी रहेको कुरा वैज्ञानिक अध्ययनले पुष्टि गरेको बताउनुभयो । खोप लगाएपछि केही व्यक्तिमा सामान्य असर देखिए पनि सुरक्षित र प्रभावकारी देखिएको उहाँले जानकारी दिनुभयो ।

उहाँका अनुसार ती सामान्य असरमा खोप लगाएको ठाउँमा दुख्ने र सामान्य सुन्निने, टाउको दुख्ने, अल्छी लाग्ने, जीउ दुख्ने, जोर्नी सामान्य दुख्ने, शरीर चिसो भएको महसुस गर्ने र सामान्य ज्वरो तथा वाकवाकी लाग्ने सामान्य असर देखिएको छ । उहाँले त्यस्ता असर देखिए पनि यी सबै केही समयपछि ठिक भएका जानकारी दिनुभयो ।

मन्त्रालयले कुनै त्यस्तो समस्या देखिए औषधिको व्यवस्थापनसहितको समूह राखिएको जनाएको छ ।