माओवादीकाे राष्ट्रिय सम्मेलन प्रज्ञा भवनमा हुने, पार्टी सदस्य ८ लाख पुग्ने अनुमान

 मंसिर १६, २०७८ बिहिबार १९:५:१० | उज्यालो सहकर्मी
unn.prixa.net

काठमाण्डाै – नेकपा (माओवादी केन्द्र) ले पार्टीको वडा सम्मेलन सफलताका साथ सम्पन्न भएको निष्कर्ष निकालेको छ । 

आज बिहीवार पार्टी केन्द्रीय कार्यालय पेरिसडाँडामा बसेको स्थायी कमिटी बैठकले पार्टीको वडा अधिवेशन सफलता साथ सम्पन्न भएको निष्कर्ष निकालेको माओवादी केन्द्रका प्रवक्ता कृष्णबहादुर महराले बताउनुभयो । कतिपय पालिकामा अधिवेशन स्थगित भए पनि आज/भोलि नै सबै सकिने र पालिका अधिवेशन पनि उत्साहपूर्वक अगाडि बढेको निष्कर्ष निकालिएको उहाँले बताउनुभयो । 

प्रवक्ता महराले अहिलेसम्म पार्टीको सदस्यता सङ्ख्या सात लाख ६ हजार पाँच सय पुगेको र पार्टी सदस्यता सङ्ख्या आठ लाख पुग्ने अनुमान गरिएको जानकारी दिनुभयो ।

बैठकले पार्टीको राष्ट्रिय सम्मेलन निर्धारित मिति पुस ११ देखि १३ गतेसम्म काठमाण्डाैकाे प्रज्ञा भवनमा गर्ने पनि निर्णय गरेको छ । त्यस्तै मङ्सिर २५ गते प्रदेश सम्मेलन गर्ने र अध्यक्ष पुष्पकमल दाहाल प्रचण्डले दिउँसो १ बजे भर्चुअल माध्यमबाट उद्घाटन गर्ने पनि प्रवक्ता महराले बताउनुभयो ।

स्थायी कमिटी बैठक भाेलि शुक्रवार बिहान ११ बजे फेरि बस्ने भएको छ ।

अन्तिम अपडेट: पुस १५, २०७८

तपाईको प्रतिक्रिया