सिलिचोङ गाउँपालिकामा पहिराे, १३ घरपरिवार जाेखिममा

भदौ २८, २०७५ बिहीबार १४:२५:५४ | नवीन गुरुङ

संखुवासभा - लगातारको वर्षाले संखुवासभाको सिलिचोङ गाउँपालिका–३, ताम्कुको याचम्खाका १३ घरपरिवार पहिरोको उच्च जोखिममा परेका छन् ।

वर्षाको कारण ठाउँ–ठाउँमा पहिरो जाने र जमिन चिरिन थालेपछि पहिरोको जोखिम बढेको हो ।

पहिरोको कारण जमिन चर्किएसँगै घरहरु पनि चर्किन थालेका छन् । याचम्खा गाउँमा ३२ घरपरिवारको बसोबास रहेको छ । त्यसमध्ये १३ घरपरिवार उच्च जोखिममा रहेका छन् भने अन्य घरपरिवारको अवस्था सामान्य रहेको ३ नम्बरका वडासदस्य मणिकुमार कुलुङले जानकारी दिनुभयो ।

उहाँका अनुसार याचम्खाका साथै छिमेकी टोल साप्तेलमा पनि पहिरो जान थालेको छ । साप्तेल टोलका १७ घरपरिवार पनि पहिरोको जोखिममा रहेका छन् ।

याचम्खा र साप्तेल टोल दुवैतिर पहिरोको कारण घरसमेत चर्किन थालेपछि वडासदस्य कुलुङले स्थानीय ताम्कु प्रहरी चौकीका प्रहरीसहित स्थलगत अनुगमन गर्नुभएको छ ।

स्थलगत अध्ययन अनुगमन गरेपछि स्थानीय विपद् व्यवस्थापन समिति, जिल्ला विपद् व्यवस्थापन समिति र जिल्ला रेडक्रस सोसाइटीमा प्रतिवेदन पेश गरी र बस्ती सार्न पहल गरिने वडासदस्य कुलुङको भनाई छ ।

जिल्लामा केही दिनअघि देखिको निरन्तर वर्षा भईरहेको छ । यस्तै वर्षा निरन्तर भइरहे याचम्खा र साप्तेलमा जनधनको ठूलो क्षतिसमेत हुने वडासदस्य कुलुङले चिन्ता व्यक्त गर्नुभयो ।

‘लगातार वर्षा भइरहेको छ, तत्कालै सुरक्षित स्थानमा स्थानान्तरण गर्न सम्बन्धित निकायहरुलेसमेत चासो दिनुपर्छ ।’—उहाँले भन्नुभयो ।

पहिरो गएको स्थान सदरमुकाम खाँदबारीबाट एकदिनको पैदल दूरीमा पर्छ । यातायातको सुविधा नपुगेको सिलिचोङ्गमा प्राकृतिक विपद् परेमा उद्धार गर्नसमेत समस्या रहेको स्थानीयहरुको गुनासो छ । त्यसैले समयमा नै रोकथाम र नियन्त्रणका लागि पहल गर्नुपर्ने उहाँहरुको भनार्इ छ ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

नवीन गुरुङ

संखुवासभाका पत्रकार नवीन गुरुङ उज्यालोका जिल्ला सम्बाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्