प्रदेश २ को मुकाम जनकपुरबाट विहारको राजधानी पटनाको लागि गुडे बस

भदौ ३१, २०७५ आइतबार १५:७:१३ | शैलेन्द्र महतो

धनुषा – आइतबारबाट धनुषाको जनकपुरदेखि पटनासमम बस सुरु भएको छ ।

प्रदेश २ को मुकाम जनकपुरदेखि भारत विहारको राजधानी पटना जोडने बस सेवालाई प्रदेश २ का मुख्यमन्त्री लालबाबु राउतले आइतबार हरियो झण्डा देखाएर उदघाटन गर्नुभयो ।

मञ्जुश्री प्रालिले सुरु गरेको नेपाल भारत मैत्री बससेवा बस जनकपुरबाट भिठ्ठामोड, सीतामढी, मुजफ्फर हुँदै पटनाको लागि छुटेको हो । जनकपुर पटना बस सेवाको बस जनकपुरबाट बिहान १० बजे र राति ८ बजे खुल्नेछ ।

त्यस्तै पटनाबाट जनकपुरका लागि अपराह्न ३ बजे, बिहान ४ बजे र राति ९ बजे बस छुट्ने समय तालिका छ । जनकपुर–पटनाको भाडा भारु. २७५ अर्थात नेपाली रुपैयाँ ४ सय ४० निर्धारण गरिएको छ ।

बससेवाको उदघाटन गर्दै मुख्यमन्त्री राउतले नेपाल भारत मैत्री बससेवाले नेपाल र भारतबीचको बेटीरोटीको सम्बन्ध अझै प्रगाढ हुने बताउनुभयो । उहाँले भारतको पर्यटक जनकपुर हुँदै देशका विभिन्न ठाउँमा जाँदा प्रदेशको साथै देशलाई आर्थिक टेवा पुग्ने बताउनुभयो ।

यसअघि गएको भदौ २५ गते नेपाल भारत मैत्री बस भारत विहारको राजधानी पटनाबाट जनकपुरको लागि छुटेको थियो ।विहारका मुख्यमन्त्री नितिश कुमारले पटनामा हरियो झण्डा देखाएर पटना–जनकपुर बस सेवाको शुभारम्भ गर्नुभएको थियो ।

अहिले प्रदेश २ को अस्थायी राजधानी जनकपुरबाटसमेत जनकपुर पटना बस सेवाको औपचारिक उदघाटन गरिएको छ ।

सन् २०१४ मा काठमाडौंमा भएको सार्क सम्मेलनमा भारतीय प्रधानमन्त्री नरेन्द्र मोदीले जनकपुर–पटना र काठमाण्डौं–बोधगया बससेवा सञ्चालन गर्ने घोषणा गर्नुभएको थियो ।

मोदीले घोषणा गरेको ४ वर्षपछि बससेवा शुरु भएको हो । तर, यसअघि प्रधानमन्त्री केपी शर्मा ओली र भारतीय प्रधानमन्त्री मोदीले जनकपुरबाट उदघाट्न गरेका जनकपुर–अयोध्या बससेवा अझै सञ्चालनमा आउन सकेको छैन ।

अन्तिम अपडेट: मंसिर ४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।