कञ्चनजङ्घा हिमालकाे फेदमा वन्यजन्तु अध्ययन–अनुसन्धान केन्द्र

साउन १, २०७९ आइतबार १८:५७:५३ | केशवप्रसाद भट्टराई

ताप्लेजुङ – ताप्लेजुङको कञ्चनजङ्घा हिमालकाे फेदमा अन्तर्राष्ट्रिय दुर्लभ वन्यजन्तु अध्ययन अनुसन्धान केन्द्र निर्माण भएको छ । वन्यजन्तुकाे अध्ययनका लागि 'हिमालयन रिसर्च सेन्टर' नामकाे वन्यजन्तु अध्ययन अनुसन्धान केन्द्र निर्माण गरिएको हो ।

हिउँ चितुवाको वासस्थान मानिएको चार हजार दुई सय मिटरको उचाइमा कञ्चनजङ्घा हिमालको फेद खम्बाचेनमा वन्यजन्तु अध्ययन अनुसन्धान केन्द्र निर्माण गरिएको कञ्चनजङ्घा संरक्षण क्षेत्र परिषद्का अध्यक्ष खगेन्द्र फेम्बु (लिम्बु) ले बताउनुभयो । यो अध्ययन अनुसन्धान केन्द्र सबैभन्दा अग्लो ठाउँमा रहेकाे उहाँकाे दाबी छ । मङ्गोलियामा पनि एक वन्यजन्तु अध्ययन केन्द्र भए पनि यो जतिकाे उचाइमा नरहेको उहाँले बताउनुभयाे ।

राष्ट्रिय निकुञ्ज, वन्यजन्तु संरक्षण विभाग, अध्ययन संस्थान, त्रिभुवन विश्वविद्यालय, काठमाण्डौ विश्वविद्यालय, कृषि वन विश्वविद्यालयमा स्नातकाेत्तर तहमा अध्ययनरत विद्यार्थीलाई सोधपत्रमा समेत सहयोग पुग्ने अपेक्षा गरी याे केन्द्र निर्माण गरिएको हो । यस केन्द्रले हिउँ चितुवाको विचरण क्षेत्रको भू–बनोट, वासस्थानको अवस्था, आहार प्रजाति, हिउँ चितुवा मानवबीचकाे द्वन्द्व आदिकाे बारेमा अध्ययन अनुसन्धान गर्नेछ ।

याे केन्द्र बनाउन सुवर्ण हिमालयन जेभी निर्माण सेवासँग २०७६ साल असार २३ गते पाँच कराेड ४९ लाख रुपैयाँमा सम्झाैता भएकाे थियाे । यही महिनामा भवन केन्द्रलाई जिम्मा लगाउने योजना रहेको कम्पनीका प्राेप्राइटर इन्द्र केदेमले बताउनुभयो ।

अनुसन्धान केन्द्रमा एकै पटक अनुसन्धानकर्ताहरू वर्षभरि नै फिल्डमा बसी अध्ययन अनुसन्धान गर्न सकिने भवन बनाइएकाे कञ्चनजङ्घा संरक्षण क्षेत्र कार्यालयका प्रमुख रमेशकुमार यादवले बताउनुभयो । यस केन्द्रका कारण पर्यटक आगमनमा पनि वृद्धि हुने उहाँकाे दाबी छ ।

कञ्चनजङ्घा संरक्षण क्षेत्रको ओलाङचुङगोला, याङमा, खम्बाचेन, रोनाल्क, रामजेल, चेराममा १३ देखि २१ वटा हिमचितुवा रहेको अनुमान गरिएको अध्यक्ष फेम्बुले बताउनुभयाे । हिउँ चितुवाको आहारा भनिएको नाउर एक हजार ६ सयभन्दा धेरै सङ्ख्यामा रहेकाे उहाँकाे भनाइ छ ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

केशवप्रसाद भट्टराई

केशवप्रसाद भट्टराई ताप्लेजुङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्