कञ्चनजङ्घा संरक्षण क्षेत्रमा चोरी सिकार बढ्दै, भेडा–बाख्रासमेत पासोमा परेर मर्छन्

साउन ५, २०७९ बिहीबार १७:५४:४४ | केशवप्रसाद भट्टराई

ताप्लेजुङ – ताप्लेजुङको हिमाली क्षेत्रमा चोरी सिकार बढेको पाइएको छ । हिमाली भेगमा पाइने कस्तुरी मृग, हिउँ चितुवा लगायतका वन्यजन्तुको चोरी सिकार भइरहेको पाइएको हो ।

स्थानीय तथा चीनको तिब्बतबाट आएकाहरूले पासो थापेर चोरी सिकार गर्ने गरेका स्थानीयवासीको भनाइ छ । बेला–बेला भेडा बाख्रासमेत पासोमा पर्ने गर्नु यसको प्रमाण भएको फक्ताङलुङ गाउँपालिका ६ लेलेपका गोपाल विष्ट बताउनहुन्छ । यो वर्षमात्रै चार वटा भेडा पासोमा परेर मरेका उहाँले बताउनुभयो । चोरी सिकार बढेको भनेर भेडापालक किसानले प्रचार गरेअनुसार धेरै मात्रामा चोरी सिकार भने नभएको कञ्चनजङ्घा व्यावस्थापन समितिका अध्यक्ष खगेन्द्र फेम्बुले बताउनुभयो । नचाहिँदो प्रचारले संरक्षणमा असर पर्ने गरेको उहाँको भनाइ छ । आर्थिक वर्ष २०७८÷०७९ मा १३ वटा पासो फेला परेको उहाँले बताउनुभयो ।

चार वर्षअघि सदरमुकाम फुङलिङबाट गएको नेपाली सेनाको नयाँ रणभीम गुल्मको टोलीले २१ वटा पासो भेटेको थियो । तत्कालीन गुल्मपति रवि केसीको नेतृत्वमा गएको टोलीले वडा ७ ओलाङचुङगोला क्षेत्रको तिगुमा, चेने, मौवाटार, देउमा क्षेत्रमा ३५ सय देखि ४२ सय मिटर उचाइमा पासोहरू भेटाएको सेनाको अभिलेखमा उल्लेख छ ।

हिमाली भेगको चार हजार तीन सय मिटर उचाइको चारराते, तावालासे, सेलेले, भेरेनी, अन्धापोखरी, कुर्लुङ आसपासको क्षेत्रमा पासो भेटेको कञ्चनजङ्घा संरक्षण क्षेत्रले बताएको छ ।

रेडपाण्डा संरक्षणसम्बन्धी काम गर्दै आएको हिमाली संरक्षण मञ्चको प्रतिवेदनअनुसार आर्थिक वर्ष २०७७÷०७८ मा जङ्गलमा थापेको १७ वटा पासो संरक्षणकर्मीले भेटेको मञ्चका कार्यक्रम अधिकृत रमेश राईले बताउनुभयो ।

वर्षाैँदेखि भइरहेको चोरी सिकार स्वीकार्दै कञ्चनजङ्घा संरक्षण क्षेत्र आयोजना अधिकृत रमेशकुमार यादवले घुन्सा क्षेत्रमा पासो थाप्नेको खोजी भइरहेको बताउनुभयो । दुर्लभ हिउँ चितुवा, कस्तुरी मृग मारेको वा मारेर त्यसको अङ्ग बेचबिखन गरेको पाइएमा १० लाख रुपैयाँ जरिबाना अथवा १० वर्ष जेल वा दुवै सजाय हुने उहाँले बताउनुभयो ।

फक्ताङ्लुङ ६ ओलाङचुङगोलाका अध्यक्ष छेतेन शेर्पाले यो क्षेत्र चीनको तिब्बतसँग जोडिएकाले सिमाना पारिबाट चोरी सिकार गर्न आउँछन् कि भन्ने आशङ्का गरिएको तर कोरोना सङ्क्रमणपछि उताबाट चोरी सिकारका लागि आएको सङ्केत नपाएको बताउनुभयो ।

तस्बिरहरू : कमल विष्ट, ताप्लेजुङ

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

केशवप्रसाद भट्टराई

केशवप्रसाद भट्टराई ताप्लेजुङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्